خبرگزاری رویترز گزارش می‌دهد که ایالات متحده امریکا تصمیم دارد تا آن چرخبال‌هایی را که پس از سرنگونی دولت پیشین افغانستان به تاجیکستان انتقال یافته اند، به دوشنبه بسپارد.

فرمانده فرماندهی مرکزی ایالات متحده امریکا می‌گوید که این چرخبال‌های نظامی به افغانستان بازگردانده نخواهند شد؛ زیرا مربوط طالبان نمی‌شوند.

به گزارش خبرگزاری رویترز، فرمانده فرماندهی مرکزی ایالات متحده در سفرش به تاجیکستان و در دیدار با مقام‌های تاجیکستان گفته است که هواپیماها و چرخبال‌های که در زمان سقوط دولت پیشین افغانستان به تاجیکستان منتقل شدند، ممکن است به دوشنبه واگذار شوند.

جنرال مایکل کوریلا، فرمانده فرماندهی مرکزی ایالات متحده امریکا، گفت: «ممکن است که ایالات متحده امریکا به تاجیکستان اجازه دهد تا چرخبال‌های را که به اردوی افغانستان کمک کرده بود و پس از سقوط در ماه اگست به این کشور انتقال داده شدند، به خود نگهدارد. ما امیدوار هستیم که بتوانیم تمامی یا بخشی از چرخبال‌ها را به دولت تاجیکستان تحویل دهیم، اگرچه زمان آن مشخص نیست اما ما تلاش داریم که این چرخبال‌ها تحویل داده شوند.»

در هنگام سقوط نظام جمهوریت در افغانستان ده‌ها چرخبال و هواپیمای نظامی به تاجیکستان و ازبیکستان انتقال داده شدند. شمار چرخبال‌های انتقال یافته به تاجیکستان و ازبیکستان بیش از ۵۰ بال گفته شده است.

اسد الله ندیم، آگاه مسایل نظامی، گفت: «یک بخشی از قصور بر می‌گردد به حکومت سابق که از این طیاره‌ها را به حیث مالک تحویل نگرفته، بل به حیث امانتدار تحویل گرفته و بخشی دیگر قصور بر می‌گردد به حکومت فعلی که باید اولتر از همه با مالک آن کسی که سفارش داده، یعنی امریکا وارد مذاکره می‌شدند.»

پیش از این امارت اسلامی از گفت‌وگوها با مقام‌های تاجیکستان و ازبیکستان برای برگرداندن چرخبال‌ها و هواپیماهای نظامی به کشور خبر داده است.

بلال کریمی، معاون سخنگوی امارت اسلامی، می گوید: «مسوولان امارت اسلامی در مورد موضوعات که با کشورها مربوط است، در تماس استند و در این مورد بعد از تکمیل شدن جزییات، معلومات شریک می‌شود.»

با این هم، مقام‌های تاجیکستان و ازبیکستان نیز گفته اند که چرخبال‌های امریکایی را که از افغانستان به این کشورها انتقال یافته اند، به حکومت امارت اسلامی واگذار نخواهند کرد.