عبدالستار مراد وزیر اقتصاد کشور، روز دوشنبه(۸ جوزا) در پایان نشست دو روزۀ همکاریهای اقتصادی افغانستان و تاجیکستان، بیان داشت که این دو کشور بر افزایش سرمایه گذاری های مشترک در بخشهای راههای آهن، جادهها و پروژه های بند برق در دوکشور به توافق رسیده اند.
نشست همکاری های اقتصادی افغانستان و تاجیکستان برای دو روز با حضور وزیر حمل و نقل تاجیکستان و مقام های حکومت افغانستان، در کابل برگزار شده بود.
عبدالستار مردا، وزیر اقتصاد در پایان این نشست به خبرنگاران گفت: «افغانستان و تاجیکستان، دو کشور وهمکار مهم در منطقه اند؛ ما تلاش داریم که در بخشهای گوناگون زمینههای سرمایه گذاری های مشترک را فراهم سازیم، تا از این راه، اقتصاد در دو کشور رُشد چشمگیری داشته باشد.»
درهمین حال، وزیر حمل و نقل تاجیکستان نیز تأکید کرد که کشورش برای پیوند دادن افغانستان به بازارهای جهانی، به افغانستان یاری میرساند و نیز تلاش میکند که راههای بیشتر بازرگانی در مرز میان دوکشورساخته شوند.
خدایارخدایار زاده بیک، وزیر حمل و نقل تاجیکستان افزود: «ما مشترکات بسیار زیاد داریم و تلاش میکنیم که با در نظر داشت نیازمندیهای مان در بخشهای گوناگون زمینههای همکاریهای مشترک را فراهم سازیم، از این میان نیاز است که افغانستان و تاجیکستان راههای بیشتر مرزی داشته باشند تا داد و ستد بازرگانی میان کشورهای مان به صورت لازم آن انجام شوند.»
وزیر حمل و نقل تاجیکستان همچنان تأکید کرد که در سه ماه اخیر، روند حمل و نقل کالاهای بازرگانی میان افغانستان و تاجیکستان به گونۀ چشمگیری افزایش یافته اند.
این درحالی است که سه روز پیش، افغانستان و تاجیکستان ششمین توافقنامۀ همکاریهای اقتصادی و بازرگانی را امضاء کردند.
بر بنیاد آمارهای مقامهای تاجیکستان، در سه ماه نخست سال جاری، میزان داد و ستدهای تجاری میان افغانستان و تاجیکستان در بخشهای سمنت و انرژی دو نیم برابر افزایش داشته است.