د افغانستان برېښنا شرکت وايي، له ازبکستان څخه وارداتي برېښنا پهدې هېواد کې د تخنیکي ستونزو له امله پرچاو شوې ده.
د دې شرکت عملیاتي مشر وایي، اسلامي امارت د ازبکستان له چارواکو سره د وارداتي برېښنا د بیا نښلولو په اړه خبرې کړې.
نوموړی زیاتوي، د پلازمېنې د برېښنا د ستونزې د حل لپاره دې شرکت د ترهخېلو د حرارتي برېښنا له دستګاه کار اخلي.
د افغانستان برېښنا شرکت عملیاتي رییس صفیالله احمدزی وايي: «د ماښام له لوري پنځه تر شپږ ساعتونو پورې د حرارتي برېښنا مرکز روښانه کوو چې زموږ لپاره ډېر لګښت هم لري، دا ځکه چې زموږ پېرودونکي یو یا دوه ساعته برېښنا ولري.»
له ازبکستان سره د وارداتي برېښنا د تړون له لاسلېدو د دوو اوونیو په تېرېدو سره، دې هېواد پر افغانستان خپله برېښنا پرې کړې ده.
افغانستان ته د ازبکستان د وارداتي برېښنا تړون د سل مېلیون ډالرو په ارزښت د ۲۰۲۳ کال لپاره غځول شوی دی چې له مخې یې تاشکند کابل ته ۴۲۰ میګاواټه برېښنا ورکوي.
د برېښنا شرکت مسوولان وایي، څرګنده نهده چې د ازبکستان وارداتي برېښنا به کله بېرته ونښلول شي.
د افغانستان بریښنا شرکت عملیاتي رییس صفی الله احمدزی زیاتوي: «له ازبکستان سره مو خبرې کړې، خو تر دې دمه مو مثبت ځواب نهدی تر لاسه کړی چې برېښنا به څه وخت بېرته عادي حالت ته راشي.»
د افغانستان بریښنا شرکت پخوانی رییس امانالله غالب وايي: «هر څه ژر چې کېدای شي، د ترکمنستان-مزارشریف مزی چې له پلخمري کابل ته تللی او ۵۰۰ کېلوواټه برېښنا لري، بشپړ کړي، د مالي ملاتړ کوونکي او کوم بل بهرني مرسته کوونکي په تمه دې نه کېږي.»
له دې سره هممهاله، د پلازمېنې یو شمېر اوسېدونکي وایي، د ژمي پهدې ساړه موسم کې د برېښنا د پرچاویو زیاتوالي د دوی ستونزې ډېرې کړې دي.
د کابل اوسېدونکی ایمل ساپی وايي: «تاسو پوهېږئ چې کابل یو ښار دی، له برېښنا پرته ژوند کول ناشوی دی، ځکه خلک له ډېرو ننګونو سره مخ دي.»
د کابل یو بل اوسېدونکی نور محمد وايي: «برېښنا پهدې ډول ده چې له دروازې راشي او له کړکۍ ووځي.»
د افغانستان برېښنا شرکت د معلوماتو له مخې، د کابل د وارداتي برېښنا مزي په ۲۰۰۸ میلادي کال کې جوړ شوي دي چې د ۳۰۰ میګاواټه برېښنا لېږد ظرفیت لري.
د دې شرکت د شمېرو له مخې، کابل څه باندې ۷۰۰ میګاواټه برېښنا ته اړتیا لري چې اوسمهال دغه شرکت تر دوه سوو میګاواته کمه برېښنا په واک کې لري.
په دې اړه مو اندونه