د نړیوال بانک تازه راپور ښيي چې د ۲۰۲۲ میلادي کال په ۹ میاشتو کې د افغانستان صادرات یو مېلیارډ او ۷ سوه مېلیونه ډالرو ته رسېږي چې ۶۵ سنله یې پاکستان ته دي.
نړۍوال بانک په خپل تازه راپور کې ویلي، په افغانستان کې د خوراکي توکو او نفتي موادو بیې راټيټې شوي دي.
د نړیوالو بانک د راپور په یوې برخه کې راغلي: «د نړۍوال بانک د راپور له مخې، په نفت کې تورم ۸ سلنه، په غنمو کې تورم ۵ اعشاریه ۱ سلنه، په بوره کې تورم ۲ اعشاریه ۷ سلنه، په غوړیو کې تورم ۲ اعشاریه ۲ سلنه او په وچه ډوډۍ کې تورم ۱ اعشاریه ۵ سلنه راکم شوی دی.»
د اقتصادي چارو کارپوه دریا خان بهیر وايي: «په وروستیو کې له افغانستان سره د نړیوالې ټولنې مرستو ژمنې، له روسیې او مرکزي اسیا څخه د تېلو واردول او همداراز د نویو بانکنوټونو چاپول او خپرېدل، دا ټول موارد د دې باعث شوي چې پر بیو خپله مثبته اغېزه ولري.»
د نړۍوال بانک په راپور کې راغلي، د افغانستان صادرات د ۲۰۲۲ کال له جنورۍ تر نوامبر میاشتې ۱ اعشاریه ۷ میلیونه ډالرو ته ورسېد؛ خو افغانستان بیا له ایران، پاکستان او چین څخه د څه کم ۳ مېلیارډ ډالرو په ارزښت سوداګریز توکي راوارد کړي دي.
د صنعت او سوداګرۍ وزارت وايي، د هېواد د صادراتو په کچه کې ډېرښت او په وارداتو کې بیا کمښت راغلی دی.
د صنعت او سوداګرۍ وزارت ویاند اخندزاده عبدالسلام جواد وايي: «په تېره اداره کې په ۱۳۹۹ کال کې ۴۳۴ مېلیون ډالر و او د ۱۴۰۰ کال په لومړیو نهو میاشتو کې هم ۴۷۸ مېلیون ډالره صادرات و چې د صنعیت او سوداګرۍ وزارت په هلو ځلو سوداګرو ته د اسانتیاوو په برابرولو سره زموږ صادرات ډېر ښه و.»
د سوداګرۍ او پانګونې خونه وايي، د هېواد ډېری سوداګریز توکي پاکستان ته صادرېږي.
د سوداګرۍ او پانګونې خونې د مدیره پلاوی غړی خانجان الکوزی وايي: «پاکستان ته زموږ اته مېلیونه ډالره صادرات شوي چې له څه باندې څلور سوه مېلیون ډالره یې کانونه دي چې په دې کې تالک، مرمر او د ډبرو سکاره دي.»
نړۍ وال بانک ویلي، افغانستان د ۲۰۲۲ کال له مارچ تر ډسمبر میاشتې پورې نږدې ۱۳۶ میلیارده افغانۍ عواید راټول کړي چې له نیمايي ډېر یې له ګمرکاتو ترلاسه شوي دي.
په دې اړه مو اندونه