مقام‌های محلی در ولایت بغلان به روز شنبه (۲۵ حمل) ادعا می‌کنند که طالبان با ویران‌ساختن یک پایۀ برق در این ولایت، برق وارداتی تاجیکستان و ازبیکستان به پایتخت را، قطع کرده‌اند.
پولیس این ولایت می‌گوید که طالبان نیمه‌های شنبه‌شب، یک پایۀ برق را در ولسوالی دوشی، نخست اره کردند و سپس با منفجرساختن آن، این پایه را ویران ساخته اند.
با ویران‌شدن این پایه، اکنون برق در شماری‌از ولایت‌ها به‌شمول پایتخت قطع شده‌است.
در همین‌حال، مسؤولان شرکت برشنا تأیید کرده‌اند که یک پایۀ برق وارداتی تاجیکستان و ازبیکستان در ولایت بغلان انفجار داده شده‌است و کارمندان این شرکت تلاش دارند تا به زودی مشکل پیش آمده را حل سازند.
همزمان با این، طالبان با فرستادن پیامی، می‌گویند که آنان در واکنش به قطع برق در بخش‌های زیر ادارۀ شان در ولایت‌های بغلان و کندز از سوی حکومت، دست به این کار زده‌اند.
این در حالی است که نزدیک به دوهفته پیش نیز افراد ناشناس یک پایۀ برق را که سیم‌های برق وارداتی تاجیکستان و ازبیکستان بر آن استوار بودند، در منطقۀ دشت کیله‌گی ولایت بغلان، انفجار داده بودند.
پیش از این، مخالفان مسلح دولت با نشر اعلامیه‌یی، تهدید کرده‌اند تا زمانی‌که در مناطق زیر تسلط آنان به مردم برق نرسد، اجازه نمی‌دهند که برق به پایتخت برسد.