د لویې څارنوالۍ ویاند جمشید رسولي نن (سې شنبې، د مرغومې په ۹مه) وايي چې دغه څلور تنه د عامې روغتیا وزارت له کارکوونکو د بډو اخیستو په تور، د لویې څارنوالۍ او ملي امنیت عمومي ریاست له خوا نیول شوي دي او له هغوی پلټنې روانې دي.
جمشید رسولي په دې اړه زیاته کړه چې دغو کسانو د دغه وزارت له کارکوونکو د بډ غوښتنه کړې وه.
ورته مهال طلوع نیوز ته سرچینې وايي چې د لومړنیو معلوماتو پربنسټ، د عامې روغتیا وزیر ورور، د تره زوی، د هغه یو سلاکار او د دغه وزارت د پروژو یو مسوول هغه څلور تنه دي چې نیول شوي دي.
د دغو سرچینو په وینا، دغه څلور تنه له هغې وروسته ونیول شول چې د عامې روغتیا وزارت د ځینو ولایتي رییسانو څخه غوښتي وو چې په میاشت کې ۷۰ تر ۸۰ زره ډالرو هغوی ته ورکړي.
سرچینې زیاتوي چې د عثماني ورور او د تره زوی په دغه وزارت کې رسمي دنده نه لرله، خو د هغه د نامه په استفادې سره د بډو غوښتنه کوله.
د عامې روغتیا وزارت تراوسه په دې اړه څه نه دي ويلي.