د افغانستان د بیارغونې لپاره د امریکا ځانګړی څارونکی یا سیګر، د حامد کرزي نړیوال هوايي ډګر له لارې له هېواده بهر ته د پیسو د قاچاق دوام، سخت اندېښمن کړی او وايي چې له هر ډول مخنیوي پرته د قاچاق بهیر دوام لري.
سیګر په یوه نوي رپوټ کې وايي چې د کابل په هوايي ډګر کې د پیسو د نمبرونو د موندلو دستګاوې له یوې لسیزې راهیسې غیر فعالې دي او حتا دولتي چارواکي، سیاستوالان او د ولسمشر د دفتر کسان د هوايي ډګر په ځانګړې برخه کې د پیسو له ثبته معاف دي.
رپوټ کې همدارنګه راغلي دي چې عادي مسافر په ۵ تر ۶ ځایونو کې تلاشي کېږي، خو ځانګړي مېلمانه حتا په یوې برخه کې هم نه څېړل کېږي.
د دغه رپوټ پر بنسټ، د هوايي ډګرونو او ځمکنیو بندرونو له لارې د پیسو د چاقاق کچه څه ۴.۵ مېلیارد ډالر اټکل شوې ده.
سیګر همدارنګه ویلي دي چې جګړپوړي دولتي چارواکي او همدارنګه هغه کسان چې سیاسي نفوذ لري او د ولسمشر د دفتر کسان، د ډېرو مهمو کسانو په توګه، د پيسو له چک څخه معاف وو.
رپوټ کاږي:«سیګر ترلاسه کړه چې د ګمرک چارواکي په هوايي ډګرونو کې په منظمه توګه د نغدي پیسو د شمېرلو له دستګاوو څخه د پیسو د بهر کولو د تعقیب لپاره استفاده نه کوي. په واقعیت کې، د پیسو د تعقیب دستګاوو له نصب څخه یوه لیسیزه وروسته، لاهم دغه دستګاوې له انټرنېټ سره نښلول شوې نه دي.»
د امریکا د متحده ایالاتونو د کانګرس د خدماتي څېړنو یو رپوټ اټکل کړی دی چې په ۲۰۱۱ کال کې څه باندې ۴،۵ مېلیارد ډالر یوازې په یوه کال کې له افغانستانه بهر ته قاچاق شوي دي چې د هغه یوه ستره برخه، د نشه يي توکو پیسې دي.
په دغه رپوټ کې همدارنګه راغلي دي چې په ۲۰۱۵ز کال کې هم د افغانستان د روڼتیا د څار بنسټ ۶۵ سلنه ټولې نغدې پیسې چې له افغانستانه بهر کېږي، په ناقانونه توګه ترلاسه شوې دي، لېږدول کېږي او یا هم تر استفاده کېږي.