د کورنیو چارو سرپرست وزیر حیات الله حیات وايي چې طالبان غواړي د ډاکتر نجيب الله د وخت په څېر حکومت راوپرځوي.
ښاغلي حیات چې په ننګرهار کې د جمهوریت او امنیتي ځواکونو په ملاتړ جوړې شوې غونډې ته وینا کوله ویل چې د کاونډیو هېوادونو استخبارات غواړي په افغانستان کې د خپلې خوښې حکومت جوړ کړي.
د کورنیو چارو سرپرست وزیر وايي د افغانستان دښمانان غواړي د تېرو حکومتونو په څېر اوسنی نظام هم ړنګ کړي او افغانستان یو ځل بیا له پښو وغورځوي.
ښاغلی حیات څرګندوي:«موږ نه غواړو د تېرو مشرانو په څېر تاریخ تکرار شي، دښمنان غواړي د ډاکټر نجیب د وخت تاریخ بیا تکرار شي او شته نظام ړنګ کړي دا یو خوب دی موږ امنیتي ځواکونه لرو.»
بل خوا د ننګرهار والي او د دې ولایت اوسېدونکي وايي چې د سولې په خبرو کې د امنیتي ځواکونو پر سر معامله د منلو نه ده:«د ټولو نه زیات تاسو ولسونه قرباني ورکوئ. خپل زامن مو د امنیتي ځواکونو لیکو ته لېږلي دي. او دوی دی چې د ولسونو امنیت ساتي.»
د ننګرهار اوسېدونکي وايي دوی په کلکه د خپلو امنیتي ځواکونو د ملاتړ لپاره ملاتړلي دي.
په ولسي جرګه کې د ننګرهار د خلکو استازی عبدالرووف شپون څرګندوي:«طالبانو ته وایم څه برنامه لری. او تاسو څه غواړی دا ښکاره کړئ موږ د یوه نظام امنیتي ړنګول نه غواړو.»
د ننګرهار په مرکز جلال اباد کې د جمهوریت او امنیتي ځواکونو په ملاتړ جوړې شوې غونډې ته له ولسوالیو نه هم ګڼ شمېر خلک راغلي وو.