د ملي دفاع وزارت سرپرست د جګړې پر مهال د جغرافیې له لاسه تلل یوه طبیعي چاره ګڼي او وايي چې، په جګړه کې د سیمو په لاس کې لرل برخلیک ټاکونکي نه دي.
بسم الله محمدي چې د ملي پوځ د ۱۳۵ ځانګړو ځواکونو په فراغتغونډه کې وینا کوله زیاتوي، دولتي ځواکونه او خلک طالبانو ته د دې اجازه نه ورکوي چې، د زور له لارې ګټونکي شي:«طالبان د تاوتریخوالي له لارې خپلې موخې ته نه رسېږي. زموږ د خلکو درد زیاتوي. خو شونې نه ده چې خپلې شومې موخې ته ورسېږي. موږ د افغانستان دفاع ته ژمن یوو.»
ورته مهال د ملي پوځ ځانګړي ځواکونه چې خورا پرمختللې پوځي زده کړې یې کړې دي او اوسمهال چمتو شوي چې د جګړې ډګرونو ته ولاړ شي. دوی د شپنیو عملیاتو په ګډون تر ټولو د پېچلو پوځي عملیاتو د ترسره کېدو ماموریت لري.
دوی وايي چې د افغانستان د آرامتیا او سولې ته د رسېدو لپاره جنګېږي.
د پوځ د ځانګړو ځواکونو د قطعې قومندان سید تولا وايي:«موږ تر هغې چې ژوندي یوو چا ته اجازه نه ورکوو چې زموږ پر خاورې او وطن حکومت وکړي.»
د پوځ د ځانګړو ځواکونو د قطعې قومندانه سکینه هم څرګندوي:«خلک دې ډاډه وي چې افغانستان ارامېږي او موږ د همدغې ورځې په هیله یوو.»
افغان حکومت وايي چې افغان امنیتي ځواکونه اوس ځواکمن او مجهز دي او د طالبانو په وړاندې د مقابلې وړتیا لري.
د امریکا ولسمشر جو بایډن هم ویلي دي چې افغان امنیتي او دفاعي ځواکونه چې اوس یې شمېر ۳۵۰ زره تنو ته رسېږي، ځواکمن دی او هغه پر دوی باور لري.
په دې اړه مو اندونه