د افغانستان د کورنیو چارو وزیر سراج الدین حقاني په خوست کې یوې ولسي غونډې ته په وینا کې ویلي دي چې امریکا دې د افغانستان کنګل شوې شتمنۍ ازاده کړي له کابل سره د تعامل پر بنسټ مخ ته ولاړه شي.
د کورنیو چارو سرپرست وزیر خوست ته په سفر کې د دغه ولایت له ولسونو سره پر بېلابېلو مسایلو خبرې کړې دي.
ښاغلی حقاني د امریکا له لوري د افغانستان د شتمنیو کنګل کول، نا عادلانه بولي.
د کورنیو چارو وزارت سرپرست سراج الدین حقاني وویل:«په دې شلو کلونو کې دې کوم ثبوت افغانستان کې پیدا کړ؟ بیا راځې د دغو خلکو په سرمایه خېټه اچوې او له محدود شمېر خلکو نه غچ اخلې، خو دوی سره خو دې شل کاله مقابله وکړله.»
نوموړی د ټول ګډونه حکومت په اړه وایي:«موږ وایوو چې په داسې ګرمو وینو کې د ټول شموله چیغې مه وهئ، لږ صبر وکړئ چې دا کفري مفکورې ختمې شي او افغانان په خپل ملي هویت او اسلامي رنګ سره برابر شي، همه شمول په خپله منځ ته راځي.»
د کورنیو چارو وزیر په دغه غونډه کې له ګاونډیو هېوادونو سره د اړیکو په اړه وايي چې زموږ له اړخ به تاسو ته هېڅ ډول ګواښ ونه رسېږي.
د کورنیو چارو سرپرست وزیر سراج الدین حقاني څرګنده کړه:«دا نه وایوو چې موږ د پاکستان، ایران او یا چین مخالف یوو، موږ افغانانو دا امتحان ورکړی دی او دوی ته بیا هم اطمنان ورکوو چې زموږ له اړخه به تاسو ته هېڅ تهدید ونه رسېږي، خو له تاسو هم د متقابل تعامل غوښتنه کوو.»
ښاغلي حقاني له خلکو وغوښتل چې د یووالي او یو بل منلو په پار هڅې وکړي.
په دې اړه مو اندونه