نن جمعه د کابل ښار په دشت برچي سیمه کې د کاج ښوونیز مرکز د شهیدانو د یاد په مناسبت غونډه جوړه شوه.
په دې غونډه کې یو شمېر ښوونکو له ټولو زده کوونکو وغوښتل چې خپلو زده‌کړو ته دوام ورکړي.
د پرتو په نوم د یو کتاب‌تون مسوول عبدالحسین وایي: «د نن غونډه د شهیدانو په یاد او زده‌کړو ته د پاتې زده‌کوونکو د رابللو لپاره ده چې د دښمن دغسې بریدونو ته تسلیم نه‌شي.»
یو ښوونکی اسلم موعودي وایي: «د اسلامي نظریې له مخې د هر ملت، هرې نظریې او د هر مکتب د بریا بنسټیز راز پوهه ده.»
بل لور ته يو شمېر زده‌کوونکي وايي، پر کاج ښوونیز مرکز بريد به د دوى د زده‌کړو د دوام مخه و نه نيسي او له حکومت غوښتنه کوي چې د ښوونیزو مرکزونو امنیت دې ټینګ کړي. 
زده‌کوونکې سودابه وایي: «د کاج ښوونیز مرکز پاتې زده‌کوونکي خپلو درسونو ته ادامه ورکوو او بیا راپورته کېږو.»
د دې مرکز یو بل زده‌کوونکی رضا وایي: «اسلامي امارت دې زموږ، کورسونو، ښوونیزو مرکزونو او ښوونځیو امنیت ټینګ کړي، څو په ټولنه کې د خدمت مصدر وګرځو.»
تېره جمعه د کابل ښار په دیارلسمه امنیتي حوزه کې پر کاج ښوونیز مرکز ځانمرګی برید وشو. د کورنیو چارو وزارت د شمېرو له مخې، په‌دې برید کې ۲۵ کسان وژل شوي او څه باندې ۳۰ ټپیان شوي دي.