د بغلان ځايي چارواکو ۵۷ لرغونې سکې د افغانستان ملي موزیم ته وسپارلې.
د دغه ولایت د اطلاعاتو او کلتور ریاست مسوولان وايي، دغه اوه پنځوس سکې چې دوه زره کاله لرغونتیا لري، هغه مهال د سیمې د اوسېدونکو له لوري کشف شوې، چې د بغلان ولایت په جلګه آرام سیمه کې د سړک جوړونې کار روان و.
د بغلان د اطلاعاتو او کلتور اسد الله مصطفی هاشمي وايي:«کابو له دوه زره کاله ډېر لرغونتیا لري او البته دا وروستۍ څېړنې نه دي او پرې تحقیقات کېږي الحمدالله د اطلاعاتو او کلتور ریاست لاسته لوېدلې دي.»
بل خوا، د ملي موزیم سرپرست وایي، چې سرپرست حکومت د تاریخي آثارو ساتنې ته ژمن دی او یوازې په کب میاشت کې د پنځوسو تاریخي آثارو د قاچاق مخه نیول شوې ده.
د ملي موزیم سرپرست محمد زبیر عبادي څرګندوي:«ملي موزیم توانېدلی ډېر شمېر اثار چې له ګمرکونو او هوايي ډګرونو قاچاق کېدل مخنیوی یې وکړي.»
اخوا، د کابل ځينې اوسېدونکي له سرپرست حکومته غواړي چې د تاریخي آثارو د معرفۍ لپاره د ولایتونو په کچه نندارتونونه جوړ کړي.
د کابل اوسېدونکي محمد عمر وویل:«موږ په خپل هېواد کې ډېر اثار لرو، په ولایتونو کې چې دي هغه دې راوړي او نندارتون دې جوړ کړي چې ټول خلک راشي او ویې ویني.»
د کابل بل اوسېدونکی صلاحالدین ظفرخېل هم وايي:«هغه اثار چې زموږ له هېواده قاچاق کېږي مخه یې ونیسي چې د نورو هېوادونو په نام عرضه نه شي.»
په هېواد کې د وروستیو څو لسیزو جګړو په لړ کې د ملي موزیم نږدې سل زره لرغوني آثار غلا او قاچاق کړای شول، په تېره لسیزه کې یوازې شل سلنه دغه آثار بېرته راګرځول شوي دي.
په دې اړه مو اندونه