د پاسپورټ ریاست عمومي رییس له طلوع نیوز سره په ځانګړې مرکه کې وايي چې، تر راتلونکو درېیو میاشتو به په کابل کې د پاسپورټ د وېش درې مرکزونه جوړ شي.
عبدالکریم حسیب دغه وايي چې په کابل کې د پاسپورټونو د ویش د نویو مرکزونو له جوړېدو یې موخه د پاسپورټ ورکړې په بهیر کې د اسانتیاو رامنځته کول دي.
ښاغلی حسیب همدا راز د پاسپورټ په عمومي ریاست کې د جعل کارانو له نیولو خبر ورکوي او ټینګار کوي چې، دمګړۍ د پاسپورټ اخیستلو په برخه کې د کمېشنکارۍ کچه ټېټه شوې ده.
د پاسپورټ ریاست عمومي رییس وویل:«موږ داسې یو پلان لرو چې په را روانو دوه درې میاشتو کې به د پاسپورټ ستونزه بلکل حل کړو، نوي پاسپورټونه موږ ته را روان دي، تړون شوی دی، د نوي پلان له مخې به انشاالله په کابل کې دوه یا درې نور مرکزونه او په ولایتونو کې به انشاالله د خلکو د تقاضا په مطابق اجازه ورکړل شي.»
ښاغلی حسیب بیا وايي، تر دې دمه یې نږدې ۲۰۰ کمېشنکاران چې له خلکو یې د پاسپورټ ورکړې په بدل کې پیسې اخیستلې نیول شوي دي. نوموړی ټینګار کوي چې ناروغانو او محصلینو ته د پاسپورټونو د وېش په برخه کې جدي پاملرنه کوي.
عبدالکریم حسیب د طلوعنیوز خبریال ته څرګنده کړه:«کمېشنکارۍ اوس بلکل ختمې شوې وي، تقریباً د ۲۰۰ په شاوخوا کې موږ کمېشنکاران نیولي او عدلي او قضاي ارګانونو ته مو سپارلي دي.»
د پاسپورټ ریاست عمومي رییس د خپلو خبرو په ترڅ کې وویل چې تېر کال یې د پاسپورټونو د وېش له درکه څلور مېلیارده او ۸۲۱ مېلیونه افغانۍ راټولې کړې دي.
ښاغلی حسیب وايي:«په تېر یوه کال کې الحمدالله دا چې پاسپورټ د وېش بهیر پېل شوی دی، موږ په دغه یوه کال کې څلور مېلیاراو ۸۲۱ مېلیونه افغانۍ په شاو خوا کې موږ عواید لرو.»
عبدالکریم حسیب داسې مهال د پاسپورټونو د وېش په برخه کې د اسانتیاو رامنځته کولو خبره کوي چې اوس مهال ډېری هېوادوال په اسانه پاسپورټ نهشي اخیستی او څو ځل یې په دې تړاو خپلې اندېښنې څرګندې کړې دي.
په دې اړه مو اندونه