د کورنیو چارو وزارت ویاند عبدالمتین قانع د ایران د پولهساتو ځواکونو قومندان څرګندونو ته په غبرګون کې وايي چې، اوسمهال له افغانستانه ګاونډیو او د نړۍ هېوادونو ته د نشهيي توکو هېڅ ګواښ شتون نهلري.
ښاغلي قانع، د نشهيي توکو پر وړاندې د هېوادونو پر ګډې مبارزې ټینګار کوي او زیاتوي، اسلامي امارت په کم وخت کې په افغانستان کې نشهيي توکي لهمنځه وړي دي.
د کورنیو چارو وزارت ویاند زیاتوي:«د افغانستان اسلامي امارت له نشهيي توکو سره د مبارزې په چاره کې ژمن دی او له نېکه مرغه توانېدلی چې په کمه موده کې او له محدودو امکاناتو سره له افغانستانه د نشهيي توکو لمن ورټوله کړي. په ډاډ سره ویلای شو چې دمګړۍ له افغانستانه د نشهيي توکو له اړخه ګاونډیو او نړۍوالو هېوادونو ته ګواښ متوجه نهدی.»
تر دې مخکې ایراني رسنیو د ایران د پولهساتو ځواکونو قومندان احمد علي ګودرزي له قوله ویلي و ترهغې چې، افغانستان بېوزله، بې ثباته او محروم پاتې شي، د ایران پر وړاندې به له دغه هېواده د نشهيي توکو ګواښ دوام ولري.
احمد علي ګودرزي ویلي:«له نشهيي توکو سره مبارزه نه یوازې د افغانستان، پاکستان او ایران ترمنځ همغږۍ او درې اړخیزې همکارۍ ته اړتیا لري، بلکې د تولید او کښت اړوند مرستې څرنګوالی يې د نړۍوالې ارادې پورې تړاو لري.»
د پوځي چارو شنونکی محمد متین محمدخېل په دې هکله څرګندوي:«د افغانستان په هره برخه کې چې د نشهيي توکو کښت او کاروبار کېده، منع شوي او له نشهيي توکو سره د مبارزې په برخه کې باید د سیمې هېوادونه هم همکاري وکړي.»
تر دې وړاندې د کورنیو چارو وزارت له نشهيي توکو سره د مبارزې معینیت ویلي و چې، د اسلامي امارت له بیا واک ته رسېدو وروسته په هېواد کې د نشهيي توکو د پروسس ۱۲۵۰ لويې او وړې فابریکې لهمنځه وړل شوې دي.