د روسيې د بهرنيو چارو وزارت مرستيال وايي، تر اوسه د بريکس په غونډه کې د افغانستان د سرپرست حکومت د پلاوي د ګډون په اړه کومه پرېکړه نه ده شوې.
 
اندري رودنکو له یوې روسي رسنۍ سره په مرکه کې ویلي، چې د بریکس هېوادونه تر اوسه په دې غونډه کې د افغانستان له لوري د یوه پلاوي د ګډون په اړه هوکړې ته نه دي رسېدلي.

 د روسيې د بهرنيو چارو وزارت د مرستيال د څرګندونو پر بنسټ، د دغه هېواد په تور نوملړ کې د هغوى د موجودیت په ګډون د سرپرست حکومت ناڅرګند دريځ پر دې پرېکړې اغېزمنه موضوع بلل شوې ده.

د روسیې د بهرنیو چارو وزارت مرستیال، اندري رودنکو ویلي: (حقیقت دا دی چې د میلمنو د بلنې پریکړه د اجماع له مخې کیږي، زما په اند لا تر اوسه د طالبانو د پلاوي د ګډون په اړه هیڅ توافق نه دی شوی، هیڅ شی نشم رد کولای که څه هم د دوی نامعلوم دریځ (د روسیې په فدراسیون کې د طالبانو غورځنګ منع دی او د یو ترهګر سازمان په توګه پیژندل شوی) دا یوه له هغو ستونزو ده چې په پریکړه کې به په پام کې ونیول شي.)

د پوهنتون استاد، ناصر شفیق په دې اړه وايي: برېکس چې د نړۍ په کچه یو سازمان دی، چې چین، روسیه، برازیل او یو شمېر نور هېوادونه پکې غړیتوب لري. دوی لومړی دې پرېکړې ته رسیږي چې دا د نړۍوالو ته د یوه منل شوي هېواد په توګه دی که نه.

تر دې وړاندې اسلامي امارت په بریکس غونډه کې چې ټاکل شوې د روانې زیږدیز میاشتې په ۲۲ او ۲۴ نېټه د روسیې په کازان کې جوړه شي د ګډون غوښتنه کړې وه.

اوس پوښتنه دا ده چې په بریکس غونډه کې د اسلامي امارت د استازي حضور څومره کولای شي د افغانستان لپاره اغیزناک وي؟

د سیاسي چارو شنونکی، سلیم پیګیر بیا وايي: که له افغانستانه هم د اسلامي امارت پلاوی ګډون وکړي، طبیعي ده چې د افغان وګړو لپاره له اقتصادي او سیاسي پلوه ډېره ګټوره ده. او اسلامي امارت ته یې هم ګټه شته.

دا په داسې حال ده چې د روان کال په جون میاشت کې د بریکس هېوادونو د بهرنیو چارو وزیرانو په یوه ګډه بیانیه کې د افغانستان د ستونزو پر سوله ییز حل ټینګار کړی وو او له خپلواک، سوله ییز، له جګړې، ترهګرۍ او نشه يي توکو خوندي افغانستان څخه یې ملاتړ کړی وو.