عدلیه وزارت په کابل او ځینو نورو ولایتونو کې د ۱۷ زره جریبه ځمکو له ارزونې خبر ورکوي.

ددغه وزارت ویاند وایي، د ځمکو د غصب د مخنیوي او د غصب شویو ځمکو د بیرته راګرځولو کمیسیون په ناسته کې، په بلخ، جوزجان، کندز، میدان وردګ، زابل او پکتیکا ولایتونو کې د زرګونه جریبه ځمکو دوسیې ارزول شوي دي.

د وزارت په وینا له ۱۷ زره جریبه ځمکو څخه، ۱۵ زره یې دولتي ځمکې دي. 

د عدلیې وزارت ویاند، برکت الله رسولي زیاته کړې: «د ځمکې د غصب مخنیوي کمیسیون په دې غونډه کې په شپږو ولایتونو کې له ۱۷ زره جریبه د زیاتو ځمکو له منځه نږدې ۱۵ زره جریبه ځمکې د دولتي ځمکو په توګه پېژندلي دي. دغه ولایتونه بلخ، جوزجان، کندز، میدان وردګ، زابل او پکتیکا دي. همدارنګه یو شمېر قضیې ځانګړې محکمې ته د غصب شوو ځمکو د څېړلو لپاره سپارل شوې دي.»
عدلیې وزارت دغه راز ویلي، په دې غونډه کې د چهارآسیاب، موسهي، د چهارآسیاب د رفاه ښارګوټي او په شکردره ولسوالۍ او د کابل په ۱۷مه ناحیه کې د سلګونو جریبه نورو ځمکو په اړه هم خبرې شوې دي او ځینې دوسیې یې د حل لپاره یې ځانګړې محکمې ته راجع کړې دي.
د سیاسي چارو شنونکی، هېواد ځاځي په دې اړه ټینګار وکړ چې: «هغه شخصي ځمکې چې د زورواکو له لوري غصب شوې دي هم باید پام ورته وشي، او موږ له اسلامي امارته غواړو چې د دې ځمکو په بېرته راستنولو کې هڅې وکړي.»
تر دې وړاندې هم د عدلیې وزارت د روانې لمریزې میاشتې پر اتلسمه اعلان کړی و، چې په تېره یوه میاشت کې یې په ۲۳ ولایتونو کې له ۲۵۰ زره جریبه زیاته دولتي ځمکه تثبیت کړې ده.