بدخشان کې د خصوصي رسنیو ځینې مسوولین او په ځانګړي ډول ښځې وايي، د اقتصادي ستونزو له امله یې ډېری کارکوونکي اوس مهال بې دندو دي.
د دوی په خبره که اقتصادي ستونزو ته یې رسېدنه و نه شي، مجبور دي چې خپلې رسنۍ وتړي.
د صدای بانو راډیو په بدخشان کې د ښځو یوه ځانګړې خصوصي رسنۍ ده، چې له یوې لسیزې راهیسې د بدخشان مرکز فیض اباد ښار کې فعالیت کوي.
بدخشان کې د یوې خصوصي رسنۍ مسووله، نجلا شېرزاد په دې اړه وايي: «تقریباً ۱۸ نجونو دلته فعالیت کاوه. د بودیجې د نه شتووالي له امله، ځینې یې له کار کولو پاتې شوې او اوس مهال یوازې اووه نجونې دلته زموږ سره دي.»
«د یوې خصوصي رسنۍ بله کارکوونکې، فایزه مزین هم وايي: یوازینۍ ستونزه چې موږ دلته ورسره مخ یو، د بودیجې او ملاتړي نشتوالی دی. زما په نظر، رسنۍ په یوه ټولنه کې بنسټیز رول لري او د خلکو غږ دی.»
بل پلو د ښځو دې ځانګړې خصوصي رسنۍ ځینې کارکوونکي وايي، له پنځو میاشتو راهیسې يې معاشونه نه دي ترلاسه کړي.
دوی د سرپرست حکومت له مسوولینو غواړي چې د ستونزو د حل په برخه کې ورسره همکاري وکړي.
د یوې خصوصي رسنۍ کارکوونکې، ارشین هم و ویل: که رسنۍ ملاتړ ترلاسه نه کړي، هغه غږ چې باید ټولنې ته ورسیږي، نه رسېږي.»
خو د بدخشان د اطلاعاتو او کلتور رییس وايي، دغه ولایت کې د رسنیو پر وړاندې د شته ستونزو حل په موخه به هڅې وکړي.
د بدخشان د اطلاعاتو او کلتور رییس، ذبیح الله امیري بیا وايي: «د دې ستونزو د حل لپاره، موږ د اطلاعاتو او کلتور وزارت د نشراتو معین بدخشان ته راوغوښت او هغه ستونزې مو ورسره شریکې کړې چې د رسنیو پر وړاندې خنډ وې.»
اوس مهال په بدخشان کې دوه انځوریزې او لس غږیزې رسنۍ فعاله دي، چې له دې ډلې دوه هغه یې د مېرمنو له لوري اداره کېږي او شاوخوا ۴۵ ښځینه او ۷۳ نارینه کارکوونکي پکې په کار بوخت دي.