د چاریکار ښاروالۍ ویلي، چې د تېر کال پرتله پر ارغوان پوښلې د ګل غنډۍ له تفریحځایه د لیدونکو شمېر زیاتوالی موندلی دی.
د چارواکو په وینا، د اختر په ورځو کې، له ټول هېواده څه باندې ۵۰ زره تنو له دغه تفریحځایه لیدنه کړې ده.
د چاریکار ښاروال راز محمد یاسر په دې هکله وايي:«موږ داسې طرحې لرو، چې انشاءالله په راتلونکو کلونو کې د ګلغنډۍ د ښکلا لپاره کار وکړو، هلته زینتي ونې وکرو، د روغتیایي خدمتونو، کانټینونو او د ماشومانو د لوبو وسایلو اسانتیاوې برابرې کړو.»
لیدونکي له سرپرست حکومته غواړي، چې هغوی ته په دغه تفریحځای کې ډېرې اسانتیاوې برابرې کړي.
د کابل اوسېدونکی علي افضلي طلوعنیوز ته وايي:«له بده مرغه موږ دلته نه د روغتیایي خدمتونو اسانتیاوې وینو، نه تشنابونه، او نه هم د کثافاتو لپاره ځانګړي سطلونه. د دې اسانتیاوو نشتوالی د چاپېریال د ککړتیا لامل ګرځي.»
د کابل اوسېدونکي ذاکر افضلي هم وویل:«دا ښکلې فضا ارزښت لري. موږ له ډېر لېرې ځایونو دلته راغلي یو.»
د کورنیو سیلانیانو د شمېر زیاتوالي په دغه ولایت کې د کاروبار پر بازار مثبت اغېز لرلی دی. سیمهییز خواړه او په ځانګړې توګه د کباب د پلور بازار غوړېدلی دی.
د واټ غاړې پلورونکی همایون په دې هکله وايي:«بازارونو کې ګڼه ګوڼه ده او ټول په دې تفریحځای کې خواړه خوري، او د خلکو کاروبار ښه روان دی.»
د یادونې ده، چې د پسرلي موسم پرمهال پر ارغوان پوښلې ګل غونډۍ ته د ورتلونکو کورنیو سیلانیانو شمېر له زیاتېدو سره له دغې لارې ښه عواید هم ترلاسه کېږي.
په دې اړه مو اندونه