ولسمشر غني خوست ته د سفر پر مهال ویلي، باید په پوځي عملیاتو کې د ملکیانو ژوند ته پام وشي، خو له دې سره په څنګ کې یې زیاته کړې چې سږ کال سوله او ټاکنې د حکومت لومړیتوبونه دي.
د دولتي عملیاتو پر مهال د ملکي مرګ ژوبلې پر مخنیوي د ولسمشر محمد اشرف غني ټينګار او خوست ولایت کې د لویو اقتصادي پروژو پرانستل د ښاغلي غني د سفر اصلي موخه وه.
ښاغلي غني په دې اړه وویل:«ټولو امنیتي او دفاعي ځواکونو ته مې لارښونه دا ده چې د ولسي وګړو د مرګ ژوبلې مخنیوی وکړي! د ولسي وګړو مرګ ژوبله د منلو وړ نه ده.»
بلخوا ولسمشر بیا په هېواد کې د بېلابېلو مسایلو سره چلند او د حالاتو څرنګوالي په تړاو خبرې کوي.
افغان ولسمشر په ډاګه کړه:«د لېوني تور چې دی، نو همدا ده چې زه له دغه هېواد سره د لېونتوب تر کچې مینه کوم. کهچېرې څوک لېونی نه وي، نو دا ستر کارونه ترسره کولای شي؟ کهچېرې سړی په سد وي وايي چې دا کېږي هغه کېږي، دا ستونزې دي. نو زه وایم چې له دغه لېونتوب سره، هر کارترسره کوم.»
یو شمېر خوستوال د ولسمشر دغو څرګندونو په اورېدو سر د خوست په اړه د ولسمشر پر پخوانیو ژمنو نیوکه کوي.
د خوست اوسېدونکي عبدل حکیم په دې اړه وویل:«ټولې هغه ژمنې چې له موږ سره شوې وې، پلي شوې نه دي.»
د خوست بل اوسېدونکي هم زیاته کړه:«له ولسمشر څخه زموږ غوښتنه همدا ده هغه ګټې چې خلک یې په خوست ولایت کې لري، په خپل پام کې ونیسي.»
ولسمشر غني د خوست هوايي ډګر ځغاست لیکې د کار د پيل او خوست ښار ته د برېښنا شبکې وېش په مراسمو کې هم ګډون وکړ.
د ولسمشر په وینا خوست ښار کې د برېښنا شبکې پرانیستې سره په لومړي ځل ۱۳ زره کورنۍ له برېښنا څخه برخمنې شوې دي.