یوه سرچینه طلوع نیوز ته وايي چې طالبانو افغان حکومت ته د ازادولو په موخه د ۵۹۲ تنو بندیانو تازه نوملړ سپارلی دی.
سرچینه زیاتوي چې د ۵ زرو طالب بندیانو له ډلې پاتې ۵۹۲ تنه به د تازه نوملړ له مخې ازاد کړی شي.
دا په داسې حال کې ده چې مخکې له دې افغان حکومت له طالبانو سره د یاد شمېر بندیانو ازادولو پر سر اختلاف درلود.
هېواد کې اوربند او افغانانو ترمنځ د سولې خبرو پیل په موخه د امریکا او طالبانو هوکړې له مخې ټاکل شوې وه ۵ زره طالب بندیان چې د افغان حکومت په بند کې دي، ازاد کړی شوې وی چې تر اوسه افغان حکومت یې له ډلې ۴۱۹ تنه ازاد کړي دي.
همداراز د هوکړې له مخې طالبان هم اړ وو چې د افغان حکومت دوه زره کسان چې له دوی سره وو، ازاد کړي وی، خو تر اوسه طالبانو یوازې ۷۳۷ بندیان ازاد کړي دي.