د فراه د کډوالو د چارو رییس وايي، په دغه ولایت کې د وروستیو نښتو او جګړو له امله په زرګونه کورنۍ بې ځایه شوي.
د فرا د کډوالو د چارو رییس رحمالدین ریګوال زیاتوي چې ځينې دغه بېځایه شوي د طالبانو او امنیتي ځواکونو ترمنځ د نښتې له امله له فراه څخه وتلي دي.
هغه زیاتوي:«د دغو نښتو له پیله تراوسه ۷ زره او ۱۷۰ کورنۍ له ولسوالیو او لیرې پرتو سیمو بېځایه شوي دي او د فراه ښار ته راغلي دي.»
اخوا د ولسي جرګې یو شمېر غړي ګواښ کوي کهچېرې فراه ولایت ته تازه ځواکونه ونه رسېږي طالبان به د فراه په ښار کې ځای پر ځای شي.
د فراه د مرکز پر لور د طالبانو پرمختګ او نښتو په دغه ولایت کې جدي اندېښنې رامنځته کړې دي.
د ولسي جرګې غړی محمد سرور عثماني وايي:«د فراه ولایت وضعیت د اندېښنې وړی دی او له حکومته غواړو چې دغه وضعیت ته رسېدنه وکړي ترڅو فراه د طالبانو لاسته ونه لوېږي.»
د فراه ښار پر لور د طالبانو يرغل د دغه ولایت اوسېدونکي هم سخت اندېښمن کړي دي.
د فراه اوسېدونکی نور احمد څرګنده وي:«موږ خپل کورنه او د اوسېدو ځایونه پرېښي دي او تښتېدلي یوو او اوس هم په بد وضعیت کې ژوند کوو او تراوسه هېچا له موږ سره مرسته نه ده کړې.»
د کورنیو چارو وزارت ویاند وایي، په دغه ولایت کې د طالبانو د ځپلو لپاره عملیات پېل شوي او تر دې مهاله د طالبانو د یو شمېر پېژندل شویو قومندانانو په ګډون یو شمېر وسلهوال هم وژل شوي دي.
د کورنیو چارو وزارت ویاند نجیب الله دانش په ډاګه کړه:«په خاک سفید ولسوالۍ کې په تازهګۍ سره زموږ عملیات پیل شوي دي، او تراوسه د دوه قومندانانو په ګډون ۱۷ ترهګر وژل شوي او دا عملیات د ترهګرو تر لهمنځه وړلو پورې به دوام لري.»
که څه هم د وسلهوالو طالبانو او امنیتي ځواکونو تر منځ نښتې دننه فراه ښار ته رارسېدلې دي خو د دغه ولایت والي او امنیه قومندان له څو ورځو راهیسې په کابل کې دي.
دواړه سیمهییز چارواکي په دې تړاو ځواب ویلو ته حاضر نه شول خو د کورنیو چارو وزارت ویاند وايي، وزارت د فراه امنیه قومندان ته لارښوونه کړې چې بېرته فراه ته ستون شي .