د پروان ځينې اوسېدونکي د چاریکار ښار د ځمکې لاندې مارکېټ د پروژې د کار پر پڅوالي نیوکه کوي.
د چاریکار ښار د ځمکې لاندې مارکیټ د جوړولو چارې څو میاشتې وړاندې د اسلامي امارت له لوري پیل شوې دي.
که څه هم د پروان سیمه ییزو مسوولانو ژمنه کړې وه چې د دې مارکېټ چارې به تر راتلونکو شپږو میاشتو بشپړوي، خو د میاشتو به تېرېدو سره، لا هم دا پروژه ګټې اخیستنې ته نه ده سپارل شوې.
د پروان اوسېدونکی نذیر الله وویل:«د چاریکار چوک کې په خیر جوړ کړي چې خلک له ډېرو ستونزو سره مخ دي که چېرې کوم ناروغ راولي نور لار نشته چې تر روغتونه یې بوځي.»
د پروان اوسېدونکی فضل احمد هم وايي:«د دغه ښار ښکلا هم راووځي او د خلکو کسب او کار هم برابر شي.»
د دې پروژې د چارو ځنډ پر دغه مسیر تلونکي ډېری موټر چلوونکي او مسافر هم له ننګونو سره مخ کړي دي.
موټر چلوونکی غلام بهلول څرګندوي:«لار بنده ده یو یا دوه کاله کېږي چې د دغې پروژې کار هېڅ نه بشپړېږي موږ هم په تکلیف یوو او مسافر هم په تکلیف دي.»
که څه هم د دې پروژې مسوولان په دې اړه له خبرو کولو ډډه کوي، خو د پروان مسوولان د دې پروژې د ځنډ لامل د ساختماني موادو نشتون یادوي.
د پروان والي مرستیال محمد ادریس انوري وویل:«موږ دغه ځنډ ته متوجه یوو اوس باید عجله وکړو چې خپل ځند جبران کړای شوو.»
د چاریکارو ښاروال سید اېمل نېکمل آغا هم څرګنده کړه:«د دې لپاره مو جدي نه ده نیولې چې دا یو خصوصي شرکت دی او هغه خلک چې پانګونه کوي احیاناً ستومانه نه شي.»
د دې پروژې د رغولو چارې تر دې دمه د پخواني او اوسني حکومت له لوري درې ځله پیل شوي، خو لا هم روښانه نه ده چې کله به بشپړ او ګټې اخیستنې ته وسپارل شي.
په دې اړه مو اندونه