په ننګرهار کې پر ۳۰۰ جریبه ځمکه د کبانو د روزنې فارمونو د جوړولو چارې پیل شوې.
چارواکي وايي، دغه ځمکه يې پنځو خصوصي شرکتونو ته اجاره ورکړې او په نږدې راتلونکې کې به ترې سلګونه ټنه کبان بازار ته وړاندې شي.
د مسوولانو په وینا، په لومړي پړاو کې به د ۷۵ زره کبانو د روزنې په ظرفيت دېرش ډنډونه فعال شي.
د کرنې، مالدارۍ او اوبو لګونې وزارت سرپرست مولوي عطاء الله عمري وايي: «ټولټال دېرش مېلیونه افغانۍ پانګونه کېږي. دا د خلکو او افغانستان ملت لپاره یو مثبت ګام دی.»
ورته مهال، په ننګرهار کې د کب روزنې په برخه کې د پنځو خصوصي شرکتونو له لارې نږدې ۲۰۰ کسانو ته د کار زمينه برابره شوې او پانګهوال وايي، غواړي پهدې برخه کې لا ډېره پانګونه وکړي.
په ننګرهار کې د کبانو روزونکو ټولنې مرستيال عبدالوهاب ساپی وايي: «که په خپل ملک کې تازه ماهي ولرو، هم به دولت ته د ځمکو ګټه ورسېږي او هم به خصوصي سکټور ته د دې ګټه ورسېږي.»
د کبانو روزنې یو شرکت مسوول عابد ايوبي زیاتوي: «اوس چې موږ کوم کارونه په نظر کې لرو، دا د نوي سېسټم سره سمبال کارونه دي.»
کب روزونکی محمد نعيم وايي: «دلته ټولې شاړې ځمکې دي، وایم ابادې شي او خلکو ته پهکې د کار زمینه برابره شي.»
اخوا د ننګرهار کانال رياست اړوند د کبانو له هغو ډنډونو چې نږدې دوه کاله وړاندې جوړ شوي وو، په لومړي ځل درې ټنه کبان بازار ته وړاندې شوي دي.
د ننګرهار کانال رياست د کبانو روزنې مسوول بلال قريشي وايي: «هر کال لپاره موږ دلته د ماهیانو ذخیره لرو، خپله نسلګیري پرې کوو، له نورو هېوادونو یې نه راوړو، همدلته روزل کېږي.»
له دې سره هممهاله په لغمان کې هم د نږدې دوه سوه زره امريکايي ډالرو په لګښت د کبانو د ۴۰ فارمونو د جوړولو لړۍ پيل شوه.
د لغمان د کرنې، اوبو لګونې او مالدارۍ رييس محمد ولي محسن وايي: «په مرکز، علیشنګ، دولتشاه، قرغهيي او لینګار ولسوالیو کې د هر فارم د جوړېدو لپاره زر مټره مربع مناسبه ځمکه په نظر کې نیول شوې ده.»
د کبانو د روزنې متخصصينو په باور که په هېواد کې د کبانو روزنې په برخه کې روانې هڅې لا ګړندۍ او توليد خالص شي؛ له ګاونډيو هېوادونو د کبانو په وارداتو اتکا کمېدلی او زرګونه کسان ور سره پر کار بوختېدلی شي.
په دې اړه مو اندونه