په جوزجان کې ځينې بې سرپرسته او اړمنې کورنۍ وايي، چې د بې وزلۍ له امله په ورځ کې د يوه وخت ډوډۍ برابرولو وس نه لري. 

خديجه چې د خپلې شپږ کسيزې کورنۍ سرپرستي کوي وايي، چې د بې وزلۍ او اقتصادي ستونزو له امله د خپلې کورنۍ لګښتونه نه شي پوره کولی او د مرستندويه او خيريه بنسټونو مرستو ته په تمه وي. 

نوموړې وايي، په ۱۰۰  او ۱۵۰ افغانيو سره د خپلې کورنۍ د ژوندانه لومړنۍ اړتياوې نه شي پوره کولی.

جوزجان کې یوه اړمنه، خدیجه وايي: زموږ حالت ته پام وکړئ او زما یتیمانو له یتیمانو سره مرسته وکړئ. هیڅوک نه لرم چې زموږ ملاتړ وکړي.

ورته مهال يو شمېر کورنۍ چې په ورځ کې له ۱۰۰ افغانيو زيات عايد نه لري وايي، چې د روژه ماتې لپاره د یوې مړۍ ډوډۍ ترلاسه کولو لپاره دلته راغلي دي. 

جوزجان کې یوه بله اړمنه، عاطفه هم وايي: اته یتیمان لرم. ځینې ورځې خواړه پیدا کوم، ځینې ورځې نه. د دوی پلار سرطان درلود، هرڅومره چې مې هڅه وکړه، درملنه یې ممکنه نه شوه او مړ شو.

بل خوا سيمه ييز مسوولين له مرستندويه بنسټونو او سوداګرو څخه غواړي، چې د بې وزله او اړمنو کورنيو مرسته وکړي. 

د جوزجان د اطلاعاتو او کلتور رییس، سیف‌الدین معتصم، وویل: «صدقې باید خپلو خپلوانو او ګاونډیانو ته ورکړ شي. همداراز، له شتمنو غواړو چې مستحقو کسانو سره مرسته وکړي.»  

دیني عالم، سید قربان سادات، هم ټینګار وکړ: «د اسلام پېغمبر (ص) ویلي دي چې که یو روژه‌دار ته روژه ماتی ورکړئ، لوی ثواب به ترلاسه کړئ. اوس که ۲۰۰ کورنۍ په نظر کې ونیسو، سلګونه روژتیان به له دې مرستو ګټه واخلي.»

د جوزجان د سيمه ييزو مسوولينو د معلوماتو پر بنسټ يو شمېر خيريه بنسټونو او سوداګرو د روژې مياشتې له لومړۍ ورځې څخه تر پايه پورې په دغه ولايت کې زرګونو اړمنو او بې سرپرسته کورنيو ته د خوراکي توکو د مرستو وېشلو لړۍ پيل کړې ده.