د سوداګرۍ او صنایعو خونه وايي، چې د روسیې تجارتي اتشې له سوداګرو او پانګوالو سره په کتنه کې ژمنه کړې چې ګمرکي محصول به معاف کړي او د هېواد صادراتو ته به لار هواره کړي.
د سوداګرۍ او پانګونې خونې مسوولین وايي، ډېر ژر به روسیې ته د صادرېدونکو سوداګریزو توکو نوملړ جوړ شي او د دغه بهیر په بشپړېدو سره به د هېواد پر صادراتي توکو د روسیې ګمرکي معافیت بهیر هم پیل شي.
د سوداګرۍ او پانګونې خونې مرستیال خیرالدین مایل وویل:«موږ د صادراتو په هکله د اسانتیا غوښتنه وکړه؛ هغوی له موږ سره د یوه جدول په لړ کې دوی زموږ څو قلمه صادراتي توکو ته د ګمرکي معافیت ژمنه کړې ده.»
د سوداګرۍ او پانګونې خونې سرپرست پر دې باور دی چې، اوس د هېواد پر سوداګریزو صادراتي توکو د روسیې د ګمرکي محصول د لوړوالي له امله مسکو ته د کابل د صادراتو کچه ټيټه ده.
روسیې ته د افغانستان وچه مېوه او په ځانګړې توګه ممیز صادرېږي.
د پانګونې او سوداګرۍ خونې سرپرست محمد یونس مومند څرګندوي:«د روسیې ګمرکي محصلولات پر موږ، ازبیکستان او تاجیکستان یو ډول وو، دا چې موږ ته یې معافیت راکړی دی، فکر کوم ښه کار دی.»
د کرنې او مالدارۍ خونې مسوولین وايي، د هېواد د کرنیزو محصولاتو لپاره روسیه تر نورو مناسب بازار دی اوپه وینا یې هر کال منځنۍ اسیا او روسیې ته میوې او سبزیجات صادرېږي.
د کرنې او مالدارۍ خونې غړی میرویس حاجي زاده څرګندوي:«له اوسنۍ موکې باید سمه استفاده وشي چې ډېر صادارت ولرو ټرانزیټ دې له حیرتانه تر روسیې دې د واګونونو په واسطه وشي.»
د کرنې او مالدارۍ خونې د معلوماتو پر بنسټ، افغانستان یوازې پروسږکال شاوخوا ۸۰ زره ټُنه کچالو روسیې ته صادر کړي او دم ګړۍ مسکو ته د پیازو صادرات روان دي.
په دې اړه مو اندونه