د اماني صندوق د مدیره پلاوي غړی شاه محمد محرابي طلوعنیوز ته وايي چې، د دغه صندوق له جوړېدو وروسته، د هغه ګټه ۴۴۰ مېلیون ډالرو ته رسېدلې ده.
د ښاغلي محرابي په وینا، چې دغه صندوق د اسعارو د بیې تثبیت، د بیو د کچو کنټرول او په پایله کې په هېواد کې د مالي ثبات د ساتلو لپاره جوړ شوی دی.
د اماني صندوق د مدیره پلاوي غړی وايي:«دمګړۍ، د دغه صندوق شتمني ۳٫۹۴ مېلیارد ډالره ده او له جوړېدو راهیسې یې ۴۴۰ مېلیونه ډالره یې ګټه لرلې ده. دا د مالي مدیریت هوښیارانه کړنې ښیې. په پای کې، د افغانستان وجهي صندوق د حکومتولۍ یو منظم چوکاټ جوړ کړی، چې د افغانستان د مالي سیسټم د ثبات لپاره ډیزاین شوی دی.»
د افغانستان وجهي صندوق د ۲۰۲۲ کال په سپټمبر میاشت کې په سویس کې د امریکا متحده ایالاتو له خوا د دغه هېواد د ۳٫۵ مېلیارد ډالره شتمنیو د ساتلو په موخه جوړ شو.
د اقتصادي چارو ځينې شنونکي وايي، چې تر اوسه د وجهي صندوق له شتمنیو د هېواد د اقتصادي ودې لپاره کار نهدی اخیستل شوی او اړتیا ده په داسې حالت کې، چې افغانۍ د نورو اسعارو پر وړاندې دومره ثبات نهلري، د مالي ثبات د ساتلو لپاره ورڅخه ګټه واخیستل شي.
د اقتصادي چارو شنونکي عبدالنصیر رښتیا په دې هکله طلوعنیوز ته وویل:«اماني صندوق چې جوړ شوی دا په حقیقت کې د افغانستان ملاتړې پیسې دي، چې کولای شي د نړۍ په بازارونو کې د افغانیو باور لوړ کړي او همدارنګه دا افغانستان نړۍوالې سوداګرۍ ته د باور ورکړې لامل کېدای شي»
خو د افغانستان د بیارغونې لپاره د امریکا د متحدو ایالتونو ځانګړي مفتش په یو راپور کې دې ته نغوته کړې، چې د امریکا حکومت ښايي د دغو څلور مېلیارده ډالرو د بېرته راستنولو په اړه بیا کتنه په کاري لومړیتوب کې ونیسي.
بلخوا اقتصاد وزارت یو ځل بیا له امریکا او اروپايي هېوادونو غواړي، چې د افغانستان شتمنۍ له قید او شرط پرته خوشې کړي.
د اقتصاد وزارت مسلکي مرستیال عبداللطیف نظري په دې هکله وايي:«ژر تر ژره باید دغه شتمنۍ د مرکزي بانک په واک کې ورکړل شي، چې د پیسو د ملاتړ په توګه په سترو اقتصادي سیاستونو او د افغانستان د خلکو د بنسټیزو اړتیاوو په برخه کې ولګول شي.»
دا په داسې حال کې ده چې د ۲۰۲۱ کال په اګست میاشت کې د جمهوریت تر نسکورېدو وروسته د افغانستان له نهو مېلیارده
ډالرو زیاته شتمني د امریکا او اروپايي بانکونو له خوا کنګل شوې دي.
په دې اړه مو اندونه