لویه څارنوالۍ وايي چې د ټاکنیزو کمېسیونونو ۱۰ پخواني کمېشنران هر یو، له اداري فساد سره د مبارزې د عدلي او قضايي مرکز لخوا په پنځو کلونو بند محکوم شول.
لویه څارنوالي وايي چې له اداري فساد سره د مبارزې عدلي او قضايي مرکز نن (سېشنبې د وږي په ۱۲مه) له پرېکړې وروسته د ټاکنیزو شکایتونو کمېسیون پخوانی رییس عبدالعزیز اریايي، او د دغه کمېسیون پخواني کمېشنران حمیرا حقمل او عبدالبصیر فایض، کونړ کې د ولسي جرګې د نوماندانو د رایو د کمولو او اضافه کولو او له خپلو واکونو د ناوړه استفادې په جرم هر یو په پنځو پنځو کلونو تنفیذي بند محکوم شوي دي.
همدارنګه د ټاکنو خپلواک کمېسیون اوه تنه پخواني غړي هر یو عبدالبدیع صیاد، وسیمه بادغیسۍ، معاذالله دولتي، رفیعالله بیدار، عبدالقادر قریشي، سید حفیظالله او ملیحه حسن په ورته جرم سره هر یو په پنځو پنځو کلونو بند محکوم شوي دي.
د لویې څارنوالۍ په وینا له وسیمې بادغیسۍ پرته نور ټول محکوم شوي کسان په نننۍ محاکمه کې حاضر وو.
دغه بنسټ وايي چې د ټاکنو خپلواک کمېسیون د دارالانشا پخوانی رییس احمدشاه زمان زی او د دغه بنسټ د ټکنالوژۍ پخوانی رییس سید ابراهیم سادات له تورونو سپين وختل او برایت ورکړل شول.