د هلمند ولایت سیمه ییز چارواکي د ټاکنو په ورځ په دغه ولایت کې د کلکو امنیتي تابیاوو خبر ورکوي.
د هلمند مرستیال والي، مجاهدالله صفاري څرګندوي چې ټاکنو د مرکزونو د امنیت لپاره د افغان ځواکونو لخوا پوځي عملیات روان دي.
د هلمند والي مرستیال، مجاهدالله صفاري زیاتوي:«د ټاکنو لپاره موږ امنیتي پلان جوړ کړی دی، کوم سایټونه چې هلته ټاکنې کیږي سر له اوسه مو هلته امنیتي کسان لیږلي دي، موږ باوري یوو چې د ټولو سایټونو امنیت خوندي دی او خلګ کولای شي په ډاډه زړه باندې په ټاکنو کې برخه واخلي.»
ښاغلی صفاري وړاندې وايي یوازې په دریو وروستیو میاشتو کې سلګونه میله وسلې او یو شمېر وسله وال نیولي دي.
دی زیاتوي:«په تعداد د سل مختلفو اسلحو چي په شپنیو عملیاتو، ځانګړو عملیاتو او یاهم په مخامخ جګړه کې په لاس راوړي دي، د هلمند د دی قطعې دنده یوازې تر هلمنده نه ده مربوط ، بلکې دوی د هېواد په نورو ولایتونو کې هم دندې تر سره کوي او هلته هم ځانګړي عملیاتونه تر سره کړي.»
په همدې حال کې د هلمند ولایتي شورا له افغان ځواکونو د ټاکنو د امنیت غوښتنه کوي.
د هلمند ولایتي شورارییس، عطاالله افغان څرګندوي:«دغه وسلې یو وخت د هلمندي ولس پر کورونو او په وژنو کي استعمالیدې، خو خوشبختانه اوس د امنیتي ځواکونو لاس ته ورغلي دي، دا چې دوی په دریو میاشتو کې دومره زحمت ایستلی دی، موږ غوښتنه کوو چې دا ډول عملیاتونه دي دوامداره کړي، تر څو خلګ په امن کې اوسي.»
که څه هم هلمند کي پنځه ولسوالی په بشپړه توګه د تېرو څو کلنو راپدیخوا د وسلهوالو طالبانو په والکه کې دي، خو یاد ځواکونه د هلمند تر څنګ د هېواد په نورو ولایتونو کي هم ځانګړي عملیاتونه تر سره کوي.
په همدې ډول د هلمند ولایت سیمه ییز چارواکي د ټاکنو د امنیت ډاډ ورکوي.