د ټاکنو خپلواک کمېسیون ګواښ کوي کهچېرې د رایو د بیاشمېرنې بهیر کې د ټاکنیزو ډلو مخنیوی دوام پیدا کړي، دغه بنسټ به په دې اړه د حکومت د مداخلې غوښتونکی شي.
د ټاکنو خپلواک کمېسیون د چارواکو په وینا، دمګړۍ د دغه بنسټ ولایتي دفترونه په اوو ولایتونو - فاریاب، سرپل، جوزجان بدخشان، پنجشېر، بغلان او تخار ولایتونو کې تړلي دي او د دغه کمېسیون کارکوونکو ته اجازه نه ورکوي څو د رایو د بیاشمېرلو بهیر پیل کړي. کمېسیون وايي چې دغه دفترونه د عبدالله عبدالله ټاکنیزې ډلې له خوا د رایو د بیاشمېرلو په اعتراض کې تړل شوي دي.
د ټاکنو خپلواک کمېسیون ویاند میرزا محمد حق پرست په دې اړه زیاته کړه:«احیاناً کهچېرې دغه ستونزه حل نه شوه، د اساسي قانون او ټاکنو قانون د حکم په پام سره، د ټاکنو خپلواک کمېسیون مکلف دی ټاکنیز نظام تطبیق کړي او په دې برخه کې، د حکومت همکاري جلب کړي، چې د قانون په چوکاټ کې په اوو ولایتونو کې حکومت اجرأت وکړي.»
خو د عبدالله عبدالله د ټاکنیزې ډلې دویم مرستیال بیا وایي چې د ټاکنو کمېسیون د دوی غوښتنو ته روښانه ځواب نه دی ورکړی او د دغه وضعیت دوام به ټاکنې کړکېچنې کړي.
د عبدالله عبدالله د ټاکنیزې ډلې دویم مرستیال اسدالله سعادتي وايي:«موږ ا ضافي او له ناقانوني غوښتنې نه لرلې؛ د روڼتیا لپاره یوه قانوني غوښتنه د کړنلارې او قانون په مطابق لرله. کهچېرې دا غوښتنه ونه منل شي، یقیناً زه فکر کوم چې نور د افغانستان په ټاکنو حساب نه کېږي.»
د رایو بیاشمېرنې بهیر تېره اوونۍ تراوسه دوام لري. د ټاکنو خپلواک کمېسیون وايي چې تراوسه دغه بهیر په ۲۴ ولایتونو کې پای ته رسېدلی او په درې ولایتونو کې - کندهار، کابل او ننګرهار - او نورو ولایتونو کې دوام لري.
د انتخاباتو کمېسیون د دارالانشا رییس په وینا تراوسه د ۲۰ ولایتونو د رایو باشمېرلو پایلې کابل ته رارسېدلي دي.
اخوا د اشرف غني ټاکنیزې ډله نورې ټاکنیزې ډلې د لومړنیو پایلو د منخنیوي په چاره کې په ناوړه ګټه اخیستنه تورنوي.
د اشرف غني د ټاکنیزې ډلې د څارنې مسوول داوود سلطان زوی څرګندوي:«د قانون په تطبیق کې هم حکومت ونډه لري او باید خپله ونډه په واضح او سمه توګه ولوبوي.»
د افغانستان ولسمشرۍ ټاکنې د روان لمریز کال د تلې په شپږمه نېټه ترسره شوې. اوس چې له دغه بهیره کابو دوه میاشتې تېرېږي، خو د ټاکنو خپلواک کمېسیون لا هم نه دی بریالی شوی چې حتا لومړنۍ پایلې اعلان کړي.