عامې روغتیا وزارت خبرداری ورکوي چې، افغانستان به په څلورو راتلونکو اونیو کې د کورونا ویروس له اړخه تر ټولو بد وضعیت کې وي.
د روغتیا سرپرست وزیر چې نن په کابل کې یوې خبري ناسته کې وینا کوله وايي، د کورونا ویروس پر وړاندې د خلکو بې غوري د دې لامل شوې چې، د دغه ویروس په صعودي بهیر کې هېڅ بدلون رانه شي.
وحید مجروح زیاتوي، په هېواد کې د کورونا وبا د لومړۍ او دویمې څپې پر تله درېیمه څپه په ډېرې چټکۍ سره د خپرېدو په حال کې ده.
هغه زیاته کړه:«لا هم د کورونا ویروس په ډېر پراخه توګه د پرخېدو په حال کې دی او هېوادوال پرې اخته کېږي او د هېوادوالو مړینه مخه په لوړېدو ده.»
په تېرو ۲۴ ساعتونو کې د کووېډ۱۹ ناروغۍ له مله ۵۱ کسان مړه شوي او څه باندې ۱۸۰۰ کسان پرې اخته شوي دي.
په ټول افغانستان کې چې کابو ۴۵۰۰ ډاکټران د کووېډ نولس ناروغانو په درملنه بوخت دي، کابو ۱۲۰ ډاکټران او روغتیاپالان په افغان جاپان روغتون کې کارکوي چې له دې منځه ۳۰ ډاکټران او روغتیاپالان د دغه روغتون په بیړنۍ څانګې کې کار کوي، دوی ته د داسې ناروغانو درملنه ورپرغاړه ده چې په ناوړه روغتیایي حالت کې دي.
میړنی برات زی یو له هغو ډاکټرانو دی چې په هېواد کې د کورونا ویروس د وبا د خپرېدو له لومړیو ورځو په افغان جاپان روغتون کې د کوویډ نولس ناروغانو درملنه کوي.
ډاکټر مېړنی برات زی وايي:«کابو درې میاشتې کېږي چې موږ کور ته نه یوو تللي؛ شپه او روځ کار کوو.»
ناروغ سید یحیی هم وویل:«دوه ورځې کېږي چې په روغتون کې یم. په دغو دوو ورځو کې روغتیايي حالت مې ۶۰ سلنه ښه شوی دی.»
د عامې روغتیا وزارت شمېرې ښيي چې په تېر یوه کال کې ۱۱۰ ډاکټران او روغتیایي کارکوونکي پر کورونا ویروس د اخته کېدو له امله مړه شوي دي.
د کرونا ویروس د ۱۸۴۳ تازه پېښو په ثبتېدو سره په ټول هېواد کې د دغو پېښو شمېر شاوخوا ۸۶ زره او د مړو شویو کسانو شمېر درې زرو ۳۵۶ ته ورسېد.