د عامې روغتیا وزارت سرپرست وایي، په ایران کې "د جي پنځه ډلې" هېوادونو د ناستې پر مهال په افغانستان کې د روغتیایي ظرفیتونو د لوړولو، روغتیایي تجربو د لېږد او سرطاني ناروغیو د کنټرول د لارو چارو په اړه خبرې اترې شوې دي.
د عامې روغتیا وزارت سرپرست ایران ته سفر وروسته نن (پنجشنبه) کابل ته راستون شو.
د عامې روغتیا وزارت سرپرست قلندر عباد وايي: «د دې سفر غرض او مقصد دا دی چې څرنګه موږ کولای شو چې د سیمې په هېوادونو کې د صحت په مختلفو برنامو کې هماهنګي منځته راوړو د صحت په مختلفو بخشونو کې موږ همکار پاتې شو.»
د عامې روغتیا وزارت سرپرست زیاتوي، ټاکل شوې د ایران د روغتیا وزیر هم په نږدې راتلونکې کې افغانستان ته راشي.
د عامې روغتیا وزارت سرپرست زیاتوي: «په دوو هفتو کې به د ایران د صحت وزیر په خپله او مل پلاوی به افغانستان ته راځي او په افغانستان کې دننه صحي وضعیت به ګوري.»
یو شمېر ډاکټران هم د افغانستان د روغتیا له برخې سره د ګاونډیو هېوادونو د لا ډېرې همکارۍ غوښتونکي دي.
ډاکټره وايي نجما سما شفاجو: «د افغانستان دولت د ګاونډیو هېوادونو مرستې ته ډېره اړتیا لري، کولای شي زموږ ګاونډیان د افغانستان د روغتیا په برخه کې پانګونه وکړي او خپل روزونکې افغانستان ته د روزنې او تجربو شریکولو لپاره افغانستان ته راواستوي.»
له بل لوري یو شمېر درمل پلورونکي بیا افغانستان ته د ګاونډیو هېوادونو د درملو پر وارداتو د محدودیتونو د لګولو له امله شکایت لري.
درمل پلورونکی مسعود وايي: «دا خپله یوه ننګونه ده چې کله واردات کمېږي، بیه ورسره خپله لوړېږي، له همدې کبله د خلکو ستونزې ډېرې زیاتې دي، نه یوازې په کابل کې په ټول افغانستان کې.»
یو بل درمل پلورونکی ابوبکر زیاتوي: «ټولې پولې باید د خلکو د روغتیا لپاره په بشپړ ډول پرانیستل شي، ځکه درمل لږ دي او د خلکو د روغتیا لپاره ټولو درملو ته اړتیا ده.»
په افغانستان کې د ملګرو ملتونو د بشري مرستو همغږې کوونکې ادارې ویلي، په روان زیږیز کال کې به ۱۷ میلیونه او ۶۰۰ زره افغانان روغتیايي مرستو ته اړتیا ولري.
په دې اړه مو اندونه