د بې پولې ډاکټرانو سازمان په افغانستان کې د روغتیايي برخې وضعیت د اندېښنې وړ بولي او وايي چې، په افغانستان او په ځانګړي ډول په بلخ ولایت کې روغتیايي مرکزونه له ګڼو ننګونو سره مخ دي.
د دې سازمان په راپور کې راغلي چې، د نوي زېږو او ماشومانو د جدي مراقبت له مرکزه د اوږدمهالي ملاتړ نشتوالي دا روغتیایي مرکزونه زیانمن کړي دي.
د بې پولې ډاکټرانو سازمان د راپور په یوې برخه کې راغلي:«په افغانستان کې د عامې روغتیا مرکزونه لکه د بلخ ولایت د مزارشریف ځايي روغتون د کارکوونکو د معاشونو، درملو او طبي وسایلو، د سونګ توکو او د اکسېجن د تدارکاتو په څېر د اړتیا وړ اوسنيو لګښتونو د پوره کولو لپاره د روغتیا سکتور د اوږدمهالي تشکیلاتي ملاتړ د نشتوالي له امله له ستونزو سره مخ دي.»
یو شمېر ډاکټران وايي اړتیا ده چې، سرپرست حکومت د روغتیايي مرکزونو د ځان بسیاینې په موخه یو پراخ او معیاري پروګرام جوړ او عملي کړي.
ډاکټر سید عبدالله احمدي وايي:«دننه په افغانستان او له افغانستانه بهر کدرونو څخه مرسته وغواړي چې، دغه ستونزه حل شي او د افغانستان خلک او د ښه روغتیايي خدمتونو ته لاسرسی پیدا کړي.»
ډاکټر روح الله حارث څرګندوي:«دمګړۍ د افغانستان روغتیايي سکټور، په شدت سره، د بهرنیو بنسټونو مرستو پورې تړلی دی او دغه مرستې د لومړنیو روغتیايي مراقبتونو په کچه چې، د روغتیايي خدمتونو د وړاندې کولو څه باندې ۷۰ سلنه پهکې شاملېږي، ډېر محسوس دی، په ځانګړې توګه د ماشومان او میندو روغتیا چې، یو نړۍوال روغتیايي لومړیتوب دی.»
که څه هم د عامې روغتیا وزارت په دې تړاو څه نهدي ویلي، خو تر دې وړاندې یې ویلي و چې، په تېرو دوه نیمو کلونو کې یې څه باندې یو زره او ۵۰۰ روغتیايي پرسونل استخدام کړی او پلان لري چې، په هېواد کې ۲۸۸ روغتیایي مرکزونه هم جوړ کړي.
په دې اړه مو اندونه