د روغتیا نړۍوال سازمان د روان کال په جنورۍ میاشت کې په افغانستان کې د شدیدو تنفسي ناروغیو د کچې له لوړېدو خبر ورکوي.

د روغتیا نړیوال سازمان سختې تنفسي ناروغۍ په افغانستان کې یوه له سترو روغتیايي ستونزو ګڼي او په خپل میاشتني راپور کې یې د جنورۍ په میاشت کې د دغې ناروغۍ له ۵۴ اعشاریه یو سلنه زیاتوالي خبر ورکړی دی.

د دغه راپور له مخې په جنورۍ میاشت کې څه باندې ۲۰۶ زره کسان په تنفسي ناروغیو اخته شوي او ۵۰۶ کسان مړه شوي دي.
 
دغه راز په یاد راپور کې د شري او کووېډ-۱۹ پېښو د کمېدو خبر هم ورکړل شوی دی.

روغتیا نړیوال سازمان د راپور یوه برخه
سخته تنفسي ناروغي
د ناروغانو شمیر: ۲۰۶،۰۷۴ کسان
د مړو شمېر: ۵۰۶ تنه
د ‌ډسمبر په پرتله ۵۴،۱ سلنه زیاتوالی

د شري ناروغي
د شکمنو پېښو شمیر: ۷،۳۰۷ کسان
د مړو شمېر: ۴۲ کسان

کوویډ-۱۹ ناروغي
د ناروغانو شمیر: ۵۶۵ کسان
د مړو شمېر: ۵ کسان
د ډسمبر په پرتله ۱۴،۵ سلنه کمښت

ډاکټر، منیر احمد کمال په دې اړه وايي: "د دې ناروغۍ له لاملونو یو هم د چاپېریال سخت اغېز کېدای شي، ځکه چې د نامناسبو سون توکو کارول ډېر جانبي زیانونه لري، چې په ځانګړي ډول د تنفسي سیسټم اغېزمنوي او د ساري ناروغیو او سینه بغل د زیاتوالي لامل کېږي."  

ډاکټران د موسمي ناروغیو په ځانګړې توګه تنفسي ناروغیو د مخنیوي په اړه داسې لیدلوري لري.

نجیب‌الله قاسمي، بل ډاکټر، وویل: "کله چې له کوره وځئ، سپارښتنه کېږي چې ځان ګرم وساتئ، ځکه هوا ډېره ککړه ده. همدارنګه، د ماسک کارول، د ګرمې مایعاتو څښل، او که د تنفسي ستونزو نښې څرګندې شي، ژر تر ژره ډاکټر ته مراجعه کول، کولای شي د ناروغۍ له شدیدېدو مخنیوی وکړي."

دا په داسې حال کې ده چې د اندراګاندي روغتون ډاکټرانو طلوع نیوز ته ویلي، چې په دغه روغتون کې هره ورځ پر تنفسي ناروغۍ اخته له ۲۰ تر ۳۰ پورې ناروغان بستر کیږي.