چينايي چارواکو نن جمعه (د وري په لومړۍ) د افغانستان او ۱۵ سیمه ییزو هېوادونو له استازو سره له لیرې لارې غونډه کې د کرونا ویروس د خپرېدو د مخنیوي لپاره د بیړنیو مرستو په اړه خبرې اترې کړې دي.
په دغه ناسته کې چینایي ډاکتران سربېره پر دې چې د پنځلسو هېوادونو له استازو سره خپلې تجربې شریکوي، په چین کې له کرونا ویروس سره د مبارزې د مرکز د تګلارو په اړه د دغو هېوادونو استازو ته معلومات ورکوي، دغه هېوادونه کولای شي د فوري پېښو پرمهال د چینایي ډاکترانو له مشورو او مسلکي مرستو ګټه پورته کړي.
په کابل کې د چین سفیر وايي هېواد یې چمتو دی په افغانستان کې د کووېډ نولس ناروغۍ په وړاندې د مبارزې په برخه کې پراخې مرستې راولېږي.
په کابل کې د چین سفیر وانګ یو وايي:«چین هڅه کوي د ورور، همکار او ګاونډي هېواد په توګه له افغانستان سره لازمې مرستې وکړي، په دې برخه کې به یوازې د چین حکومت نه بلکې چینايي شرکتونه او مرستندویه ادارې مرستې وکړي، دلته به د چین سفارت هم هر ډول مرستې او همکارۍ برابرې کړي.»
له بلخوا د بهرنیو چارو وزارت د اقتصادي چارو مرستیال وايي ډېر ژر به د تخنکي وسایلو د مرستو یوه الوتکه د کرونا ویروس د پراختیا د مخینوي په موخه له چین څخه افغانستان ته راشي.
له بلخوا په کابل کې د چین سفیر وايي په چین کې د کرونا ویروس په وړاندې په دوه میاشتنۍ مبارزې سره په تېرو دوو ورځو کې په نوموړي هېواد کې د کووېډ نولس ناروغۍ مثبته پېښه نه ده ثبت شوې.
نوموړی وایي په چین کې افغان محصلین د دوی د بچیان په شان دي او د هغوی لپاره یې ټول امکانات برابر کړي دي.