د هېواد کرېکټ بورډ اعلان کړی چې راشد خان عربي متحده اماراتو ته رسېدلی او ټاکل شوې ده چې تر راتلوونکو څلورو ورځو د اېرلنډ په وړاندې درې یو ورځنیو لوبو کې ولوبېږي.
له دې مخکې، د هېواد د کرېکټ دغه ستوري د اسټرالیا په لیګ کې لوبه کوله. محمد نبي هم له ملي لوبډلې سره یوځای شو.
د شنبې په ورځ، د هېواد د کرېکټ ملي لوبډلې په یوې تمریناتي لوبه کې اېرلنډ لوبډلې ته د ۲۲ منډو په توپیر سره ماتې ورکړه.
د هېواد ملي لوبډله کابو یوه اوونۍ کېږي چې په اماراتو کې د دغو سیالیو لپاره چمتووالی نیسي.
د افغانستان او اېرلنډ ترمنځ لوبې په ابوظبي ښار کې د شیخ زاهد په لوبغالي کې ترسره کېږي.