پرون په کابل کې د وزلوبې غوره لیګ سیالیو درېیم پړاو پای ته ورسېد او د کندهار لوبډلې د دې سیالیو په پای لوبه کې لومړی مقام خپل کړ.
د دې سیالیو پای لوبه د کندهار او کندوز لوبډلو تر منځ تر سره شوه. د کندهار لوبډلې دوه پر صفر د کندوز لوبډلې ته په ماتې ورکولو سره د دې سیالیو اتلولي خپل په نوم ثبت کړه.
د وزلوبې فدراسیون مرستیال فهیم نظري وايي: «هڅه کوو چې بل سیالۍ په زونونو کې تر سره کړو او هر زون ته لاړ شو او سیالۍ وکړو.»
په دې سیالیو کې ګډونکوونکو لوبډلو او د وزلوبې مینهوالو له حکومت غوښتنه کوي چې له دې لرغونې سیالۍ ملاتړ وکړي.
د بلخ اوسېدونکی معراج وايي: «له اسلامي امارته مو غوښتنه دا ده چې په راتلونکې کې دا ډول کلتوري سیالۍ جوړې کړي.»
د ملي راډېو-ټلوېزیون عمومي رییس احمدالله وثیق وايي: «حکومت د دې سیالیو ملاتړ کوي، څو دا سیالۍ وده وکړي او المپیک دنده لري چې دا ډول کلتوري او افغاني سیالیو ته وده او پرمختګ ورکړي.»
د کندهار وزلوبې لوبډلې لوبغاړی فیصل حسن وايي: «د خلکو دعاګانې، ښه اسونه او زموږ د لوبډلې غوره مدیریت و چې موږ اتلولۍ ته ورسېدلو.»
د بدني روزنې او ورزش رییس او د المپیک کمېټې سرپرست نظر محمد مطمین وايي: «په دې لیګ کې چې کومې ستونزې وې، زموږ همکارانو له ځان سره یادښت کړي او په راتلونکو لیګونو کې به حل شي.»
په دې سیالیو کې د هېواد له بېلابېلو ولایتونو ۱۶ لوبډلو ګډون کړی و.
په دې اړه مو اندونه