د افغانستان کرېکټ ملي لوبډلې نن سهار (سې شنبه، چنګاښ ۵) بنګلدیش ته د ماتې ورکولو سره د نړۍوال شل اوری جام نیمه پایلوبې ته لار ومونده.

په دغه لوبه کې د افغانستان ملي لوبډلې بنګلدیش ته د ۸ منډو په توپیر ماتې ورکړه.

د بنګلدیش کرېکټ ملي لوبډلې د ۱۷،۵ اور په ترسره کولو سره او د خپلو ټولو لوبغاړو په سوځېدو سره و نه کړای شول چې د افغانستان له لوري ورکړ شوی هدف پوره کړي او یوازې ۱۰۵ منډې یې جوړې کړې.

د دغې لوبې په لومړۍ پاڼۍ کې افغانستان د ۵ لوبغاړو په سوځېدو سره سیالې لوبډلې ته ۱۱۶ منډې هدف وټاکه.

په لوبغالي کې د ورښت له امله وروسته بیا ۲۰ اورونه ۱۹ اورونو ته راټيټ شول او د هدف دوه منډې هم راکمې شوې.

راشدخان او نوين الحق ۴ وېکټې او محمد نبي او ګلبدین د یوې یوې وېکټې په ترلاسه کولو سره د بنګلدیش لوبډلې ټول لوبغاړې وسوځول.

افغانستان به اوس په نیمه پایلوبه کې له سوېلي افریقا سره لوبه وکړي.