د فلسطین د اشغال شویو سیمو په اړه د ملګرو ملتونو د خپلواکې پلټنې نړۍوال کمیسیون په یوه نوي راپور کې راغلي، چې اسراییلي پوځ غزه کې د جنګي جنایتونه، قصدي وژنې او نسل وژنه ترسره کړې ده.
د دغه کمیسیون مشر ویلي، چې غزه کې له ۹۰ سلنې زیات ښوونیز مرکزونه ویجاړ شوي او ماشومان له زدهکړو بېبرخې شوي دي. هغه دغه کړنې د فلسطیني ولس پر وړاندې د یوه پراخ او بېرحمه یرغل برخه بللې ده.
د ملګرو ملتونو د خپلواکې پلټنې نړۍوال کمیسیون مشرې، ناوي پیلی ویلي: «زموږ راپور ښیي چې اسراییل په بنسټیز ډول د غزې ښوونیز نظام لهمنځه وړی دی. له ۹۰ سلنې زیات ښوونځي او پوهنتونونه ویجاړ شوي یا زیانمن شوي او دغه حالت ماشومانو ته زدهکړې ناشونې کړي دي. دا بریدونه د فلسطینیانو پر وړاندې د یوه پراخ او بېرحمه یرغل برخه دي.»
د ملګرو ملتونو د دغه کمېسیون یوه کمېشنر ټینګار کړی چې د دغو جنایتونو مسوولیت هم د قومندانانو او هم د هغو کسانو پر غاړه دی چې دا کړنې یې ترسره کړي دي. هغه خبرداری ورکړی چې هر څوک چې جنګي جنایتونه کوي، باید راتلونکي کې حساب ورکړي.
د ملګرو ملتونو د پلټنې کمیسیون کمېشنر، ریس سیډوټي ویلي: «هغه کسان چې د مشرتابه یا قومندانۍ په موقف کې دي، د خپلو تر لاس لاندې کسانو د کړنو مسوول دي. خو حساب ورکول فردي اړخ هم لري او زه فکر کوم دا بشپړ انصاف دی چې هغو کسانو ته چې په دغو جنایتونو کې ښکېل دي، و وایو چې د خپلو کړنو حساب ورکړي، او ښايي په راتلونکي کې له عدلي تعقیب سره مخ شي.»
اسراییل اوس هم غزه کې خپل بریدونو ته دوام ورکړی او د غزې د روغتیا وزارت د شمېرو لمخې، د اسراییل د بریدونو له پیله تر دې دمه ۵۵ زره او ۶۳۰ فلسطینیان وژل شوي او ۱۲۹ زره او ۸۸۰ تنه نور ټپیان شوي دي.
په دې اړه مو اندونه