د ولسمشر لومړي مرستیال امرالله صالح د کابل پر پوهنتون د برید طراح او پلانوونکي له نیول کېدو خبر ورکوي.
ښاغلي صالح پر خپله فېسبوک پاڼه لیکلي دي د «عادل» په نامه یوه کس چې د پنچشېر ولایت اوسېدونکی او د کابل پوهنتون کې د شرعیاتو پوهنځی یې تر درېیم ټولګي لوستی او وروسته «ثنا الله» په نامه د حقاني شبکې د یوه غړي له خوا حذب شوی و، د دغه برید طرحه کوونکی دی.
د ولسمشر د لومړي مرستیال په وینا، دغه کس اعتراف کړی دی چې دنده یې لره ځينې کارونه ترسره کړي چې حکومت تر فشار لاندې راشي.
امرالله صالح د حزب التحریر، طالب او داعش د نومونو له اخیستو سره وايي چې هغو کسانو چې دا برید ترسره کړی، څو هویته لري.
د هغه په وینا، عادل نومي ویلي دي چې وسلې یې له حقاني شبکې څخه په خوست ولایت کې ترلاسه کړې وې.
د کابل پر پوهنتون برید کې لږ تر لږه ۲۲ تنه ووژل شول او کابو ۴۰ تنه نور ټپيان شول.
داعش د دغه برید مسوولیت منلی دی؛ خو حکومت د دغه برید مسوول طالبان ګڼي او طالبان بیا په دغه برید کې خپل لاس لرل رد کړي دي.
د طالبانو وینا ذبیح الله مجاهد په یوه ټویټ کې دا څرګندونې رد کړي دي او ویلي یې دي چې نیول شوی کس په حقاني شبکې پورې تړاو نه لري.