د کابل پولیس په یوې خبرپاڼه کې وايي چې نن (سې شنبې د مرغومې په ۲مه) په کابل ښار کې د یوې چاودنې په پایله کې پنځه تنه وژل شوي او دوه تنه نور ټپيان شوي دي.
خبرپاڼه زیاتوي چې دغې پېښه نن سهار ۰۷:۳۳ دقیقې د کابل ښار د اوومې امنیتي حوزې په اړوند دوغ اباد سیمه کې هغه مهال رامنځته شوه چې د څرخي پله زندان د یوې موظفې ډاګټرې پر کرولا ډوله موټر ماین چاودنه وکړه.
په خبرپاڼه کې د قربانیانو د پېژاند په هکله جزییات نه دي ورکړل شوي.
تراوسه د طالبانو په ګډون هېڅ ډلې د دغې پېښې مسوولیت نه دی منلی.
په څه باندې دوو میاشتو کې د امنیت ضد څه باندې ۶۰ پېښې
د ولسمشر د لومړي مرستیال امرالله صالح له خوا د کابل د امنیت د ټينګښت د مسوولیت له اخیستو کابو دوو میاشتو وروسته دغه ښار د څه باندې ۶۰ امنیت ضد پېښو شاهد و.
د طلوع نیوز د ارزونې پربنسټ، په تېرو ۶۴ ورځو کې، کابل د درې ځانمرګو له هغې ډلې د کابل پر پوهنتون، د کوثر پر ښوونیز مرکز او پغمان ولسوالۍ کې، ۲۹ ماین چاودنې، درې توغندويي بریدوهه، ۲۶ وسله وال بریدونه، او دوه موټربم چاودنې شوې دي.
د دغو بریدونو په پایله کې، ۱۳۳ تنه وژل شوي او ۲۸۰ تنه نور ټپیان شوي دي.