د سولې مذاکراتو د دویم پړاو د پیل په درشل کې ولسمشر غني او د ملي روغې جوړې عالي شورا رییس عبدالله عبدالله نن یوه لیدنه سره لرله او د دغو مذاکراتو د پیل په هکله یې سره خبرې وکړې.
ولسمشرۍ ماڼۍ وايي چې په دغې لیدنه کې د ملي روغې جوړې عالي شورا د تېرې ورځې پر جوړې شوې غونډې هم بحث وشو.
په خپرپاڼه کې راغلي دي چې ولسمشر غني د سولې مذاکراتو د دویم پړاو د مخته بیولو لپاره د مرکچي پلاوي او حکومت پر ګډ کار ټینګار کړی دی.
د دغې خبرپاڼه کې همدارنګه کاږل شوي ولسمشر غني وویل چې افغان حکومت د افغانستان د سولې بهیر د ملاتړ له ډلې سره یوځای، د مذاکراتو راتلوونکي پړاونه به مخته یوسي.
د مذاکراتو دویم پړاو
عبدالله عبدالله ټینګار کړی دی چې د سولې مذاکراتو دویم پړاو د هغه په ټاکلي وخت د مرغومې په ۱۶مه به پيل شي.
ښاغلي عبدالله چې د جمعې په ورځ د ملي روغې جوړې عالي شورا د مشرتابه کمېټې په دویمه غونډه کې وینا کوله، اعتراف وکړ چې د سولې بهیر پېچلی دی.
هغه وویل:«مهمه ده چې په هماغه نېټه د مذاکراتو دویم پړاو پیل شي.»
د افغانستان اسلامي جمهوریت او طالبانو مرکچي پلاویو په دوحه کې له ۹۳ ورځو خبرو اترو وروسته پر یوه درې اوونیز ځنډ چې د لیندلۍ له ۲۴ - د مرغومې تر ۱۶مه سره سلا شول.
ټاکل شوې ده چې تر راتلوونکو ۹ ورځو دا مذاکرات له سره پیل شي.