د افغانستان بانک په یوې خبرپاڼه کې چې نن (یکشنبې، د سلواغې په ۵مه) خپره شوې د دې پخلی کوي چې په کابل ښار کې یوې چاودنه کې د دغه بانک د منازعاتو د حل رییس عبدالله درانی له خپل چلوونکي سره ټپي شوی او یو ساتونکی یې وژل شوی دی.
خبرپاڼه همدارنګه کاږي چې دغه پېښه نن سهار ۸:۱۲ دقیقې د کابل ښار د اتمې حوزې په اړوند په شاه شهید سیمه کې رامنځته شوه چې د ښاغلي دراني پر موټر یوه مقناطیسي ماین چاودنه وکړه.
له دې مخکې، د کابل پولیسو په یوې خبرپانه کې په دغې پېښه کې د درې تنو د ټپي کېدو پخلی کړی و، خو د دغې پېښې په اړه ډېر جزییات وړاندې کړې نه دي.
له دې مخکې، د پېښې شاهدانو ویلي وو چې پر یوه زغره وال موټر چاودنه کې پنځه تنه ټپيان شوي دي.
تراوسه د طالبانو په ګډون هېڅ ډلې د دغې پېښې مسوولیت نه دی منلی.
ورته مهال د ننګرهار ځايي چارواکي وايي چې نن سهار د جلال اباد ښار د څلورمې حوزې په اړوند سیمه کې چاودنه کې درې تنه ټپيان شوي دي.
ځايي چارواکي زیاتوي چې په دې هکله پلټنې روانې دي.