د فاریاب خواجه سبزپوش ولسوالۍ کې تېره ورځ(پنجشنبې د سلواغې په ۱۶مه نېټه) د طالبانوبرید پایله کې د شپږم کنډک قومندان په ګډون پنځو سرتېرو ژوند بایللی دی او یو شمېر هم د طالبانو په لاس اسیر شوي دي.
د فاریاب والي، نقیب الله فایق وايي:"زموږ پنځه سرتېري د شپږم کنډک د قومندان په ګډون ژوند بایللی او یو شمېر هم اسیر شوي دي، طالبانو ته هم مرګ ژوبله اوښتې او پنځه مړي یې د جګړې ډګر کې پاتې دي."
سیمې ته تازه دمې سرتېري رسېدلي دي او له طالبانو سره د جګړې له چمتووالي وايي.
د فاریاب ځانګړي واحد د ټولي قومندان، عبدالاحد څرګندوي:"د دښمن له منځه وړلو لپاره راغلي یوو، نن د هېواد قسم خوړلو دښمنانو برید وکړ او موږ هم ورته سخت ځواب ورکړ."
د پوځ افسر، شفیق الله شفیق زیاتوي:"موږ دا کالي د دې لپاره نه دي اغوستي چې ارام کینو او د افغانستان دښمنانو ته اجازه ورکړو چې خلک ووژني، موږ اجازه نه ورکوو او د وینې تر وروستي څاڅکي له هېواده دفاع کوو."
د فاریاب والي وايي چې له ولسمشر غني سره یې ټلفوني خبرې کړي دي او هغه دولتي ځواکونو ته سپارښتنه کړې چې په ټول ځواک سره د دښمن پر وړاندې ودریږي.
له دې سره هم مهاله فاریاب کې پر طالبانو هوايي بریدونه شوي او ورته درنه مرګه ژوبله اوښتې ده، خو طالبانو د یوې ویډیو په خپرولو سره چې ښیې افغان سرتېري اسیر شوي دي، وايي چې ډېر شمېر افغان سرتېرو ته یې مرګ ژوبله اړولې ده.