د هېواد دفاع وزارت د هرات ولایت ادرسکن ولسوالۍ کې د طالبانو له بنده د ملکي کسانو او افغان پوځیانو په ګډون د ۳۴ تنو له ازادولو خبر ورکوي.
د یاد وزارت خبرپاڼه کې نن(چهارشنبې د کب په ۱۳مه نېټه) راغلي چې کمانډو ځواکونو تېره شپه دغه عملیات ترسره کړي او د طالبانو یو زندان یې مات کړی دی.
د خبرپاڼې کې راغلي چې په دغو کسانو کې«۱۱ سرتېري، ۷ پولیس، ۳ هوايي ځواکونه، ۵ تنه د ملي پروژو کارکوونکي، ۷ دولتي کارکوونکي او ۱ تن هم د سیمه ییزو پولیسو غړی» شامل دي.
خبرپاڼه کې راغلي دي چې پوځي عملیاتو کې د طالبانو زندان له منځه تللی دی.
د هرات والي، وحید قتالي څرګندوي:«دا زندان د ادرسکن ولسوالۍ کروچه کلي کې و. د دغو هېوادوالو د ازادولو عملیات د شپې یوولس بجې پیل شول او تر سهاره یې دوام درلود.»
نوموړی زیاتوي:«دغو عملیاتو کې لس طالب وسله وال وژل شوي دي او افغان ځواکونو ته هېڅ زیان نه دی اوښتی.»
طالبانو په دې تړاو څه نه دي ویلي.