د امریکايي ځواکونو د مرکزي قومندانۍ یا «سنټکام» قومندان جنرال مک کنزي د پنجشنبې په ورځ وویل چې هغه اندېښمن دی چې له افغانستانه د امریکايي ځواکونو له وتلو وروسته به افغان ځواکونه ونه کړای شي دوام پیدا کړي.
ښاغلي مک کنزي د امریکا مشرانو جرګې پوځي کمېتې ته وویل:«زموږ له وتو وروسته، زه د افغان پوځيانو د وړتیا او د هغوی د ساتلو په هکله اندېښمن یم، د افغان هوايي ځواکونو د وړتیا په هکله، په ځانګړې توګه له دې وروسته چې موږ له دغو ځواکونو خپل ملاتړ ودروو، اندېښمن یم.»
هغه وویل چې افغان ځواکونو په دې وروستیو کلونو کې د امریکا او نورو هېوادونو له خوا ملاتړ سره عادت شوي دي.
ښاغلي کنزي له مخکې پنټاګون په غونډه کې هم ویلي چې ولسمشر بایډن د ځواکونو د وتو له اعلان مخکې، له هغه او نورو جګپوړو پوځیانو سره مشوره کړې ده.
ورته مهال سناټور جیم انهوفي ویلي چې په منځني ختیځ کې د ټرمپ ادارې تګلارې د ملي ګټو پرتله تر ډېره سیاسي وې.
هغه وویل:«لومړی په افغانستان کې دغې ادارې پرېکړه د وخت پر بنسټ نه بلکې د شرایطو پر بنسټ ونیوله. موږ په دې پوهېږو او د هغه په هلکه مو ډېر وخت خبرې کړې دي.»
ښاغلي مک کنزي د هغه په ځواب کې وویل:«موږ اوس په افغانستان کې د ملاتړ، مشورې ورکړې او همکارۍ ماموریت پای ته رسوو. موږ په سیمه کې د ترهګرۍ پر ضد د عملیاتو دوام لپاره د پلان جوړونې په هڅه کې یوو. چې افراط پاله سازمانونه چې په افغانستان کې د خپل پایښت په لټه کې دي، تر دوامداره فشار او څارنې لاندې وي.»
هغه د امریکايي ځواکونو له وتو وروسته، په کابل کې د امریکا د سفارت د ساتلو په هکله د پوښتنې په ځواب کې وویل چې هغوی د دغه سفارت ساتلو ته ژمن دي خو زیاته یې کړه چې د هغه امنیت د کوربه هېواد له مسوولیتونو څخه دی.
هغه زیاته کړه:«د یوه سفارت امنیت د کوربه هېواد مسوولیت دی. د نړۍ په ګوټ ګوټ کې زموږ ډېری سفارتونه کم پوځي حضور لري د دې لپاره چې کوربانه هېوادونه خپل مکلفیتونه ترسره کوي. دا د اندېښنې یوه موضوع ده. چې ایا په افغانستان کې راتلوونکی حکومت زموږ له وتو وروسته د دغه کار وړتیا لري که نه. دا موضوع تر راتلوونکو څو اوونیو زموږ له وتو سره هم مهاله به معلومه شي او موږ به وضعیت وڅېړو.»