د پروان ولایت د سیدخېل ولسوالۍ د علماوو رییس مولوي سیف الله صافی د ناپېژانده وسله والو له خوا ترور شو.
د سیدخېل ولسوال احمد لمر عثمان یار وايي چې دغه پېښه نن سهار (یکشنبې د غبرګولي په دویمه) د سیف الرحمن شهید لېسې د دروازې په مخکې رامنځته شوې ده.
هغه زیاتوي چې وسله وال کسان له سیمې تښتېدلي دي.
امنیتي چارواکو تراوسه په دې هکله څه نه دي ویلي.
تراوسه د طالبانو په ګډون هېڅ ډلې د دغې پېښې مسوولیت نه دی منلی.
ورته مهال د حبیب الرحمن شهید ښوونځي سرمعلم نن سهار د دغه ولایت په جبل السراج ولسوالۍ کې د ناپېژانده وسله والو له خوا ترور شو.
د پېښې شاهدان وايي چې بریدګر د دغه سرښوونکي له ترور وروسته تېښته کړې ده.
په دغې پېښه کې د دغه سرښوونکي یو زوی هم ټپي شوی دی.
تراوسه د دغې پېښې انګېزه معلومه نه ده.