د کابل د درېیمې امنیتي حوزې په اړوند سرکاریز سیمه کې د تېرې شپې د دوو چاودنو د وژل شویو کسانو شمېر ۱۰ تنو ته لوړ شو.
په دغو چاودنو کې د ښاري خدمتونو دوه کاسټر موټر په نښه شوي دي، چې ۱۲ تنه یې ټپيان کړي هم دي.
لومړني ماین د سه شنبې شپې په اوو نیمو بجو د درېیمې حوزې په سرکاریز تمځای کې پر یوه کاسټر موټر وچاودېد. په دې چاودنه کې شپږ تنه ووژل شول.
د پېښې شاهد مهدي په دې هکله وايي:«موتر چې همدې ځای (د پېښې ځای ته نغوته کوي) ته ورسېد چاودنه یې وکړه. زه ګنس شوم، د هټۍ مخې ته ولوېدم.»
څلورلس کلن علي اقا د دغو چاودنو یو له قربانیانو دی. د نوموړي کورنۍ وايي هغه غوښتل چې په همدغه موټر کې د خپل یوه خپلوان واده ته ولاړ شي، د علي کورنۍ وایي چې د اوو روغتونونو له لټولو وروسته یې، د هغه مړی په ډېر بد وضعیت کې په عدلي طب کې پیدا کړ:«څلور کلن ماشوم یې ټوټې ټوټې کړ، ایا دولت شتون لري که یوازې په نوم دولت دی؟ که چېرې دولت دی ولې د ملت غم نه خوري.»
له لومړنۍ چاودنې څو شېبې وروسته په همدغه ځای کې پر یوه بل کاسټر موټر چاودنه وشوه. په دې چاودنه کې څلور تنه ووژل شول.
د سیمې اوسېدونکی سید نور الله سادات څرګندوي:«پرون مې ماشومان له ویالې راویستل، ټول ملکیان وو، په منځ کې یې پوځي نه وو.»
په داسې حال کې چې د دغو چاودنو مسوولیت کومې ډلې پرغاړه نه دی اخیستی، ځينې سیاستوال او د ولسي جرګې غړي د پلازمېنې په دې سیمه کې پر ولسي وګړو بریدونه پلان شوي ګڼي.
د ولسي جرګې غړی عارف رحماني وویل:«د امنیتي ځواکونو له چارواکو سره کله چې کېنو مشخص ادرسونه اعلان وي؛ طالب دی، داعش دی، حقانی دی! خو دا د نسل وژنې سریال نه پای مومي او نه هم کمېږي.»
دا په داسې حال کې ده چې کابو یوه میاشت مخکې، د کابل په لوېدیځ کې درې چاودنو د یوه ښوونځي زده کوونکي په نښه کړل؛ هغه چاودنې چې د ۸۷ تنو ژوند یې واخیست او څه باند ۱۸۰ تنه نور یې ټپیان کړل.