د امریکا مرکزي قوماندانۍ یا سینټګام پرون د سېشنبې په ورځ ویلي، چې امریکا له افغانستانه ۹۰ سلنه ځواکونه ایستلي دي.
دا تر هغې وروسته چې امریکایي او نور بهرني ځواکونه، د تېرې جمعې په ورځ په افغانستان کې د دوی د تر ټولو لویې اډې (بګرام) نه ووتل. بهرني ځواکونه دغلته شاوخوا ۲۰ کاله مېشت ول.
د امریکا د مرکزي قوماندانۍ رپوټ کې راغلي:«د جولای تر پینځمې نېټې، دومره تجهیزات له افغانستانه وتلي چې ۹۸۴، سي ۱۷ الوتکو کې وړل کېدای شي – همدا شان ۱۷،۰۷۴ عدده وسایل د دفاع لوجستیک برخې ته سپارل شوي دي.»
د امریکا مرکزي قوماندانۍ دا نهدي ویلي، چې اوسمهال یې څومره سرتېري په افغانستان کې پاتې دي.
د امریکا ولسمشر جوبایډن تېر اپریل کې اعلان وکړ، چې د راروان سپټمبر تر ۱۱ مې به خپل ټول ځواکونه له افغانستانه وباسي، چې ورپسې ناټو هم وویل، چې دوی هم، تر همدغې نېټې خپل ټول ځواکونه له افغانستانه باسي.