اندونیزیا اعلان کړی دی چې په نږدې راتلوونکي کې خپل استازولي په افغانستان کې بېرته پرانیزي او د افغانستان له نوي حکومت سره جوړونکی تعامل به پيل کړي.
د اندونیزیا د بهرنیو چازو وزارت په وینا دا کار به د کابل او جاکارتا ترمنځ رغنده تعامل زیات کړي.
د اندونیزیا د بهرنیو چارو وزارت همدارنګه ټينګار کوي چې د سفارت بېرته پرانیستل په د اسلامي امارت د په رسمیت پېژندلو په مانا نه وي.
د اندونیزیا د بهرنیو چارو وزارت استازی عبدالقدیر جیلاني وايي:«زموږ موخه د رغنده تعامل لرل دي، په لومړي ګام کې د بشرپالنې په تېره بیا له ښځو سره د مرستې، تحصیلي بورسونو او نورو چارو په برخه کې، ځکه زموږ ګټې د یوه پراخ او سوله ییز افغانستان په لیدولو کې دي.»
په دې لړ کې کابل په افغانستان کې د اندونیزیا د سیاسي استازولۍ پرانېستل ستایي. د اسلامي امارت د ویاند مرستیال له نورو هېوادونو سره د افغانستان تعامل مهم بولي.
د اسلامي امارت د ویاند مرستیال بلال کریمي وویل:«موږ د نړۍ هېوادونو د سیاسي استازولیو له بیاپرانیستو هرکلی کوو او له نورو هېوادونو هم غواړو چې په افغانستان کې د بشري وضعیت د ښه والي لپاره له نوي حکومت سره تعامل ولري او خپل سفارتونه په افغانستان کې پرانیزي.»
د مخکیني حکومت تر سقوط وروسته اندونیزیا په کابل کې د خپل سفارت چارې د لنډمهال لپاره په پاکستان کې خپل سفارت ته وسپارلې.
څه موده وړاندې فرانسې او جرمني هم په نږدې راتلونکې کې د خپلو سیاسي استازولیو د پرانیستلو لپاره افغانستان ته د خپلو ډيپلوماټانو د لېږلو خبره وکړه.
د سیاسي چارو شنونکی سید هارون هاشمي څرګندوي:«د نړۍ هېوادونه له ډپيلوماټيک پلوه حق لري چې په هر هېواد کې سیاسي استازولي ولري او د رسمیت پېژندلو مسله د حکومت په کړنې پورې تړاو لري او له نړۍ سره د جوړجاړي لپاره باید ځينې کړنې عملي کړي.»
د سیاسي چارو شنونکی محمد فیصل هم وايي:«د نړۍ هېوادونه باید د افغانستان له خلکو سره د مرستې لپاره حکومت ومني او له هغه سره تعامل وکړي چې د خلکو لپاره کار وکړي او د ټولو قومونو د فعالیت لپاره زمینې برابرې کړي.»
په دې اړه مو اندونه