د ملګرو ملتونو امنیت شورا په یوه تازه رپوټ کې خبرداری ورکړی دی،چې د جمهوري نظام تر ړنګېدو وروسته د القاعده شبکې او منځنۍ آسیا د جنګیالو پر پناه ځای د افغانستان د بدلېدو زمینه برابره شوې ده.
دغه شورا اندېښمنه ده چې بهرني ترهګر په افغانستان کې واک ته د طالبانو له بیاځلې رسېدو سره په ازاده توګه فعالیت لري.
د ملګرو ملتونو د امنیت شورا همدارنګه ټینګار کوي چې د بهرنیو ترهګرو د فعالیت د محدودولو لپاره د اسلامي امارت د ګام پورته کولو هېڅ څرک نه لیدل کېږي.
ورته مهال د دغه ۲۴ مخیز رپوټ موندنې ښيي چې د القاعده شبکې پخوانی مشر اسامه بن لادن زوی عبدالله کابو څلور میاشتې مخکې افغانستان ته د طالبانو د لیدو لپاره راغلی دی او همدارنګه امین محمد الحق سام خان، څوک چې د اسامه بن لادن د امنیتي چارو د همغږۍ مسوول و، د اګست میاشتې په وروستیو کې په افغانستان کې خپل کور ته راستون شوی دی.
د ملګرو ملتونو سازمان د امنیت شورا په رپوټ کې راغلي دي:«یوه غړي هېواد رپوټ ورکړی دی چې د اسامه بن لادن زوی عبدالله په اکټوبر میاشت کې له طالبانو سره د کتنې لپاره افغانستان ته سفر کړی دی. غړي هېوادونه اندېښمن دي،چې طالبان به بالاخره په افغانستان کې القاعدې ته په دې شرط پناه ورکړي،چې القاعده د نړیوال مشروعیت لپاره د طالبانو هڅو ته زیان ونه رسوي.»
خو اسلامي امارت دغه رپوټ بې بنسټه ګڼي د اسلامي امارت د ویاند مرستیال بلال کریمي په دې هکله وايي:«هېڅ سفر نه دی شوی او په دې برخه کې له هېچا سره لیده کاته نه دي شوي.»
په رپوټ کې دا تایید شوې چې د ۲۰۲۱ کال تر جنوري میاشتې پورې د القاعده شبکې مشر ایمن الظواهري ژوندی و، خو ویل شوي دي چې که اوس ژوندی هم وي، له روغتیایي اړخه ښه نه دی.
د ملګرو ملتونو دامنیت شورا د بهرنیو ترهګرو د فعالیتونو د کابو کولو لپاره د طالبانو ژمنه له پوښتنې سره مخ کوي او وايي:«هېڅ داسې نښه نشته چې طالبانو دې د بهرنیو ترهګرو د فعالیتونو د محدودولو لپاره ګامونه اخېستي وي. برعکس دغه ډلې اوس د تېرو کلونو پرتله ډېرې آزادۍ لري.»
د پوهنتون استاد حکمت الله میرزاده وايي:«د افغانستان د سیاسي او اقتصادي بې ثباتۍ دوام د دې لامل کېږي چې کورنیو او بهرنیو ترهګرو ډلو فعالیت ته ډېره زمینه برابره شي.»
د سیاسي چارو کارپوه عبدالغفار کامیاب هم څرګندوي:«د دا ډول رپوټونو په هکله باید جدي غور وشي او د هغو تورونو او مطالبو په هکله چې د افغانستان خلکو او نړۍ حیرانه وي باید لاس واخیستل شي.»
خو اسلامي امارت د دغه رپوټ په ردولو سره وایي چې د دوحې د سولې د هوکړې له مخې، د نورو هېوادونو پر وړاندې له افغانستانه د کار اخیستو د مخنیوي پر ژمنې ولاړ دی.
د بهرنیو چارو وزارت د ویاند مرستیال حافظ ضیاء احمد تکل څرګندوي:«د دې ادعا چې په افغانستان کې د بهرنیو ترهګرو فعالیتونه زیات شوي دي، رد وو. اسلامي امارت دا ډول بې بنسټه رپوټونه چې سند او شواهد نه لري، د افغانستان، سیمې او نړۍ په خیر نه ګڼي.»
نړۍوالې ټولنې د افغانستان د حکومت د رسمیت پېژندلو لپاره یو وارله مخه اصلي شرط دا اعلان کړی چې اوسنی حکومت به له ترهګرو ډلو په تېره بیا القاعده شبکې سره اړیکې پرې کوي.
په دې اړه مو اندونه